21.10.2026 | 23:30
Էրդողանն ու Ալիևը հեռախոսազրույց են ունեցել՝ Բաքվի կողմից Անկարայի նկատմամբ կոշտ քայլերի ֆոնին
Արսեն Բեգլարյան. «Այս մակարդակում հեշտ չի լինում»
15.07.2026 | 18:42
Երևանի «Ալաշկերտի» դարպասապահ Արսեն Բեգլարյանը նախախաղային ասուլիսում անդրադարձել է ղազախական «Ելիմայի» դեմ Կոնֆերենցիաների լիգայի որակավորման առաջին փուլի պատասխան խաղին, Ղազախստանից հաղորդում է Factor TV-ի թղթակիցը։
«Առավոտյան հասցրել ենք զբոսնել քաղաքում։ Հաճելի տպավորություն ստացանք: Սա իմ առաջին այցը չէ Ղազախստան։ Առաջին անգամ այստեղ եղել եմ 2013 թվականին՝ երիտասարդական հավաքականի կազմում: Ի դեպ, դա իմ նորամուտի խաղն էր։ Դրանից հետո ևս մի քանի անգամ եղել եմ Ղազախստանում։
Առաջին խաղից հետո կա տպավորություն, որ մեր առջև շատ լուրջ մրցակից է։ Այս մակարդակում հեշտ չի լինում։ Մանրամասն վերլուծել ենք առաջին հանդիպումը մարզչական շտաբի հետ։
Ինչ վերաբերում է թիմի նորեկներին, մեզ միացած տղաները շատ որակյալ ֆուտբոլիստներ են և հրաշալի մարդիկ։ Նրանք շատ արագ հարմարվեցին թիմին։ Մենք ունենք խաղային յուրահատուկ համակարգ, և ժամանակ է պետք, որպեսզի լիովին հարմարվեն։ Սակայն կարող եմ ասել, որ նորեկներն արդեն հասցրել են ցուցադրել իրենց անհատական որակները, իսկ ապագայում ավելի կուժեղացնեն թիմը»,- ասել է Հայաստանի ազգային հավաքականի դարպասապահը։
«Ելիմայ» – «Ալաշկերտ» խաղը կկայանա հուլիսի 16-ին Ղազախստանի Սեմեյ քաղաքի «Սպարտակ» մարզադաշտում ու կմեկնարկի Երևանի ժամանակով 19։00-ին։ Երևանում կայացած առաջին խաղում գրանցվել է 1։1 հաշիվը։ «Ալաշկերտի» ու «Ելիմայի» դիմակայության հաղթողը որակավորման երկրորդ փուլում կմրցի ռումինական «Կլուժի» հետ։
Դավիթ Եղիազարյան
