14.07.2026 | 16:01
Իրանը հայտնում է Բանդար Աբբասում և Բուշերում պայթյունների ու հարվածների մասին
«Քրեական հեղինակությունների» գործը դատարան է ուղարկվում․ 15 մեղադրյալ, 9-ը՝ կալանքի տակ
Հասարակություն
14.07.2026 | 11:50
Քննչական կոմիտեն ավարտել է քրեական աստիճանակարգության բարձրագույն կարգավիճակ ունեցող և նրանց հետ փոխկապակցված անձանց վերաբերյալ բազմադրվագ քրեական վարույթի նախաքննությունը։ Սպանության փորձի, ավազակության, առևանգման, թմրամիջոցների ապօրինի շրջանառության, գողությունների և այլ ծանր հանցագործությունների համար հանրային քրեական հետապնդում է հարուցվել 15 անձի նկատմամբ, որոնցից 9-ը կալանավորված են։
«ՀՀ քննչական կոմիտեի հատկապես կարևոր գործերի քննության գլխավոր վարչության մարդու դեմ ուղղված հանցագործությունների քննության վարչությունում ավարտվել է քրեական աստիճանակարգության բարձրագույն կարգավիճակ ունեցող և նրանց հարող անձանց կողմից կատարված բազմադրվագ հանցանքների վերաբերյալ քրեական վարույթի նախաքննությունը։
Մասնավորապես՝ քրեական վարույթի շրջանակում քննչական խմբի կողմից իրականացված մեծածավալ վարութային գործողությունների, ինչպես նաև օպերատիվ-հետախուզական միջոցառումների արդյունքում ստացված ապացույցների հիման վրա սպանության փորձի, սպանության նախապատրաստության, մի խումբ անձանց կողմից նախնական համաձայնությամբ ավազակության, բնակարանների գողությունների, հրազենի ապօրինի իրացման, հրկիզման եղանակով ուրիշի խոշոր չափերի գույքի ոչնչացման, իրացման նպատակով խոշոր չափերի թմրամիջոց պահելու, մի խումբ անձանց կողմից նախնական համաձայնությամբ մարդու առևանգման, զենքի գործադրմամբ խուլիգանության համար 15 անձի նկատմամբ հանրային քրեական հետապնդում հարուցելու միջնորդություն է ներկայացվել հսկող դատախազին, որը բավարարվել է:
15 անձից 9-ի նկատմամբ որպես խափանման միջոց կիրառվել է կալանքը, իսկ մյուսների նկատմամբ՝ այլընտրանքային խափանման միջոցներ:
Քրեական վարույթը մեղադրական եզրակացությամբ ուղարկվել է հսկող դատախազին՝ այն հաստատելու և քննության առնելու համար դատարան ուղարկելու միջնորդությամբ»,- ասված է ՔԿ-ի տարածած հաղորդագրությունում։
