08.07.2026 | 19:45
Հայտնի են ֆուտզալի Հայաստանի չեմպիոնի մրցակիցները Չեմպիոնների լիգայի նախնական փուլում
Փաշինյանի հրահանգով սկսվել է Ծառուկանի ունեզրկման գործընթացը․ «Մայր Հայաստան»
Քաղաքականություն
08.07.2026 | 18:00
«Մայր Հայաստան» կուսակցությունը հայտարարություն է տարածել ԲՀԿ նախագահ Գագիկ Ծառուկյանի կալանավորման կապակցությամբ՝ պնդելով, որ Հայաստանում խախտվում են սահմանադրական սկզբունքներն ու մարդու հիմնարար իրավունքները։ Կուսակցությունը Ծառուկյանի նկատմամբ իրականացվող գործողությունները գնահատել է որպես քաղաքական հետապնդում, հիշեցրել նաև իր նախագահ Անդրանիկ Թևանյանի ձերբակալության մասին և քաղաքացիներին կոչ արել համատեղ ջանքերով վերականգնել օրենքի գերակայությունն ու սահմանադրական կարգը։
Հայտարարությունը՝ ստրոև․
«Հայաստանում հաստատվել է սողացող բռնատիրություն, որտեղ չեն հարգվում մարդու հիմնարար ազատություններն ու սահմանադրական սկզբունքները։ ԲՀԿ նախագահ Գագիկ Ծառուկյանի նկատմամբ սկսված քաղաքական հետապնդումը սահմանադրական հիմնարար իրավունքների խախտման հերթական դրսևորումներից է։ Փաշինյանի հրապարակային հրահանգով սկսվել է Ծառուկյանի, ըստ այդ անձնավորության հրահանգի, ունեզրկման գործընթացը։
«Մայր Հայաստան» կուսակցությունը նման անօրինությունների տուժողներից է, որի նախագահ Անդրանիկ Թևանյանը, կրկին Փաշինյանի ապօրինի, հրապարակային հրահանգով, շինծու գործով ձերբակալված է, իսկ մյուս անդամների տներում խուզարկություններ են կատարվել։ Մենք մեր օրինակով գիտենք, թե ինչպես է գործում ռեժիմի «արդարադատությունը»։
«Մայր Հայաստան» կուսակցությունը դիմում է Հայաստանի քաղաքացիներին։
Հարգելի՛ քաղաքացիներ,
Հայաստանում այլևս չեն գործում սահմանադրական սկզբունքները, սահմանադրական իրավունքը, և միայն մենք՝ միասնական ջանքերով, կարող ենք վերականգնել սահմանադրական կարգը։
Լինենք միասնական՝ հասկանալով, որ միայն օրենքի գերակայության ու սահմանադրական կարգի վերականգնման դեպքում Հայաստանը կարող է ունենալ ապագա։ Այլ ճանապարհ չկա, և դա պետք է լինի այսօրվա Հայաստանի քաղաքական օրակարգի հիմնական առանցքը»։
Հիշեցնենք, որ հուլիսի 6-ին, Գագիկ Ծառուկյանը ձերբակալվել էր, իսկ ավելի ուշ դատարանը նրա նկատմամբ որպես խափանման միջոց ընտրել էր երկամսյա կալանքը։
Նրան առաջադրված մեղադրանքները նա և պաշտպանական կողմը չեն ընդունում՝ դրանք համարելով անհիմն և քաղաքական դրդապատճառներով։
