Ծափահարություններ՝ Ալեն Սիմոնյանին․ Ռուբինյանը ԱԺ ամբիոնից շնորհակալություն հայտնեց

«Հարգելի՛ գործընկերներ, քանի որ նիստը շուտով կավարտվի, և, ամենայն հավանականությամբ, սա կլինի ութերորդ գումարման Ազգային ժողովի վերջին նիստը, ես ուզում եմ իմ և նաև բոլորիս անունից շնորհակալություն հայտնել Ազգային ժողովի նախագահ Ալեն Սիմոնյանին՝ վերջին հինգ տարիներին Ազգային ժողովի նախագահի պարտականությունները փայլուն կատարելու համար»,- ԱԺ ամբիոնից հայտարարեց Ռուբեն Ռուբինյանը: 

«Պարոն Սիմոնյանը շատ կարևոր ժամանակաշրջանում է Ազգային ժողովի նախագահ եղել. աշխարհի ամենահեշտ Ազգային ժողովում չէ, որ նախագահ է եղել: Բոլորդ տեսել եք, թե ինչ մարդկանց, տեղ-տեղ էլ՝ սուբյեկտների հետ է ստիպված եղել շփվել: Այս տարիների ընթացքում Հայաստանն անցել է բազմաթիվ բարդությունների, դժվարությունների միջոցով, բայց մենք բոլորս՝ Հայաստանի Հանրապետության վարչապետի գլխավորությամբ, և մենք էլ Ազգային ժողովում՝ պարոն Սիմոնյանի գլխավորությամբ, հասել ենք մեր ամենակարևոր խոստման կատարմանը՝ խաղաղությանը, և ես ուզում եմ շնորհակալություն հայտնել պարոն Սիմոնյանին մեր քաղաքական թիմն առաջնորդելու համար:

Բայց սա դեռ ամենը չէ, որովհետև պարոն Սիմոնյանն այս ամեն ինչը մենակ չի արել: Մեզ լքում է նաև Ազգային ժողովի լավագույն փոխնախագահ Հակոբ Արշակյանը: Եվ ես ուզում եմ շնորհակալություն հայտնել նաև պարոն Արշակյանին՝ իր պարկեշտության և իր քաղաքական սկզբունքայնության համար: Եվ ուզում եմ արդեն իմ, պարոն Սիմոնյանի և պարոն Արշակյանի անունից շնորհակալություն հայտնել «Քաղաքացիական պայմանագիր» խմբակցությանը՝ պնդության, հաստատակամության համար, և խմբակցության ղեկավար Հայկ Կոնջորյանին, որը կրկին փայլուն կատարեց իր առաքելությունը»,- նշեց նա։

Մանրամասները՝ տեսանյութում։