Ելույթների համար գրանցվել են մարդիկ, որոնց երեխաները ընդհանրապես ՀՀ քաղաքացիներ չեն․ Ալխաս Ղազարյան. ՏԵՍԱՆՅՈՒԹ

«Ինչքան էլ որ փորձեն բնութագրել այս նախագծերի փաթեթը որպես էմոցիոնալ և այլն, ինչպես տեսաք, ընդդիմությունը հենց ինքն է էմոցիոնալ ելույթներ ունենում և ամեն ինչ կապում է այս կամ այն իրադարձության հետ»,- նշեց պատգամավոր Ալխաս Ղազարյանը։

Հիշեցնենք՝ ԱԺ-ն այսօր քննարկում է «ՀՀ ընտրական օրենսգրքում» փոփոխություններ կատարելու մասին նախագիծը, ըստ որի` նախորդող 730 օրվա ընթացքում Հայաստանի Հանրապետությունում փաստացի 366 և ավելի օր չգտնվելու դեպքում ՀՀ քաղաքացին կամ ռեզիդենտ հանդիսացող անձինք չեն կարողանա մասնակցել ընտրություններին կամ հանրաքվեներին։

Ղազարյանը պնդեց՝ օբյեկտիվ անհրաժեշտություն է, որ ընտրություններին և հանրաքվեին մասնակցության իրավունքի իրացման պայմանները հիմնված լինեն ոչ միայն քաղաքացիության ձևական առկայության, այլ Հայաստանի Հանրապետության հետ անձի փաստացի կայուն և ստուգելի կապի վրա:

«Այս կապը նաև պատասխանատվության կապ է: Քաղաքացին ոչ միայն մասնակցում է իշխանությունների ձևավորմանը և որոշումների ընդունմանը, այլ իր վրա է կրում այդ իշխանության գործունեությունը և որոշումների հետևանքները: Հետևաբար, նախագծով այդ չափանիշը ձևակերպվում է հստակ և կանխատեսելի եղանակով՝ նախորդող 730 օրվա ընթացքում Հայաստանի Հանրապետությունում փաստացի 366 և ավել օր գտնվելու պահանջով:

Ու ամենազավեշտալին այն է, որ այնտեղ ելույթների համար գրանցվել էին մարդիկ, ում երեխաները առհասարակ Հայաստանի Հանրապետության քաղաքացիներ չեն: Ինձ համար հետաքրքիր է, թե ինչպիսի ելույթներ պետք է ունենային և ինչ միտք պետք է արտահայտեին այդ առումով, որովհետև հստակ երևում է, որ այդ մարդիկ իրենց ապագան և իրենց կենսական շահերը Հայաստանի Հանրապետությունում չեն տեսնում: Հետևաբար, երևի սա հաշվի առնելով էլ՝ խուսափեցին ելույթներ ունենալուց»,- նշեց Ղազարյանը։

Մանրամասները՝ տեսանյութում։