Կոչ անում է Կառավարության ղեկավարը, բառացի ասում է՝ գնացե՛ք, հեղափոխություն արե՛ք․ Աջապահյան․ ՏԵՍԱՆՅՈՒԹ

«Արդա՞ր եք որակում Վերաքննիչ քրեական դատարանի որոշումը»,- «Ոչ բավարար»,- Վերաքննիչ քրեական դատարանի բակում՝ ազատ արձակվելուց րոպեներ անց, ասաց Շիրակի թեմի առաջնորդ Միքայել արքեպիսկոպոս Աջապահյանը՝ անդրադառնալով իր գործը նոր քննության ուղարկելու դատարանի որոշմանը։

Հիշեցնենք՝ քիչ առաջ Վերաքննիչ քրեական դատարանը՝ դատավոր Էդգար Մանասյանի նախագահությամբ, դատավորներ Նարինե Հովակիմյանի ու Վաչե Մարգարյանի կազմով, ավելի քան 3 ժամ առանձին սենյակում անցկացնելուց հետո որոշում կայացրեց պաշտպանական կողմի բողոքը բավարարել մասնակի․ գործն ուղարկվեց նոր քննության, հոգևորականի նկատմամբ կիրառված տնային կալանքը վերացվեց, բացակայելու արգելքը՝ մնաց անփոփոխ։

Այս մասով հոգևորականը կատակեց․ «Դատարանի որոշումը ոչ բավարար էր, որովհետև չարդարացվեցի։ Տնային կալանքը փոխեց, վերացրեց։ Ավելի լավ էր՝ պահեր, ֆուտբոլ էի նայում գիշերները, հիմա չեմ կարողանալու նայեմ»։

Անդրադառնալով մեղադրանքին, Աջապահյանը կրկին շեշտեց՝ ի սկզբանե ասել ենք՝ շինծու էր, ի սկզբանե շինծու մնաց, շարունակում է մնալ շինծու։

«Կոչ անում է, արդեն որերորդ անգամ է, անում է Կառավարության ղեկավարը։ Բառացի ասում է՝ գնացեք արեք հեղափոխություն։ Ես նման բան ասել եմ, ուրեմն ո՞վ պիտի դատվի, նա պիտի դատվի, ես պիտի դատվեմ»։

Հիշեցնենք, որ Երևանի քրեական դատարանի դատավոր Արմինե Մելիքսեթյանը իշխանությունը զավթելու հրապարակային կոչ հնչեցնելու գործով 2025-ի սեպտեմբերի 24-ին մեղադրական վերդիկտ է կայացրել Հայ առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանի վերաբերյալ և օրեր անց կայացված դատավճռով նրան դատապարտել 2 տարի ժամկետով ազատազրկման։

Շիրակի թեմի առաջնորդին մեղադրում են այն բանում, որ «ունենալով արքեպիսկոպոսի հոգևոր աստիճան և պարբերաբար հրապարակային ելույթներով հանդես գալով զանգվածային լրատվության միջոցներով, ունենալով մեծ թվով հետևորդներ, հետևաբար, նաև իր խոսքով հասարակության անդամների վարքագիծն ուղղորդելու զգալի հնարավորություն, համաձայն չլինելով ներքին և արտաքին քաղաքականության հետ կապված հարցերի վերաբերյալ ՀՀ կառավարության դիրքորոշումների հետ, օգտագործելով զանգվածային լրատվության միջոցները, տեղեկատվական ու հաղորդակցական տեխնոլոգիաները, նախ՝ 2024 թվականի փետրվարի 3-ին, ապա նաև 2025 թվականի հունիսի 21-ին զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր»։

Մանրամասները՝ տեսանյութում։