Բաքուն «Արևմտյան Ադրբեջանի ժառանգությունը․ վերադարձ պատմական արմատներին» միջոցառում է կազմակերպել

Բաքուն շարունակում է պետական մակարդակով Հայաստանի նկատմամբ անհիմն պահանջների ներկայացման քաղաքականությունն ու պատմակեղծարարությունը։ Ադրբեջանական լրատվամիջոցների հաղորդմամբ՝ Գյոյգոլի շրջանի Ենի Զոդ գյուղի «Խան Յուրդու» էթնոհամայնքում անցկացվել է «Արևմտյան Ադրբեջանի ժառանգությունը․ վերադարձ պատմական արմատներին» խորագրով փառատոնը։ Միջոցառումը կազմակերպվել է, այսպես կոչված, «Արևմտյան Ադրբեջանի» համայնքի կողմից՝ Գյոյգոլի շրջանի գործադիր իշխանության հետ համատեղ:

Նշվում է, թե  փառատոնը ներառում է «հատվածներ, որոնք արտացոլում են Արևմտյան Ադրբեջանի տարբեր շրջանները՝ ներկայացնելով ավանդույթները, բանահյուսություն, արհեստներ, աշուղական մեղեդիներ։ Ներկայացվել են նաև լուսանկարներ, նկարներ, գրքեր և ձեռագործ աշխատանքներ, որոնք արտացոլում են շրջանի պատմությունն ու մշակույթը, ելույթներով հանդես են եկել «Իրևան» մարզական ակումբի մարզիկները»: Նշենք, որ «Իրևան» ասելով՝ Բաքուն նկատի է ունենում ՀՀ մայրաքաղաք Երևանը։

Ադրբեջանի Մեջլիսի պատգամավոր, նաև Բաքվի կողմից ստեղծված, այսպես կոչված, «Արևմտյան Ադրբեջանի» համայնքի ղեկավար Ազիզ Ալեքբերլին նշել է, թե կազմակերպությունը, իբր, միավորում է «միլիոնավոր հայրենակիցների, որոնք ենթարկվել են տեղահանության և էթնիկ զտումների, ինչպես նաև նրանց ժառանգներին»։ Նա նշել է, որ դրա նպատակն է «ապահովել անվտանգ և արժանապատիվ վերադարձը հայրենի հողեր, ընդգծել է Ադրբեջանի նախագահ Իլհամ Ալիևի 2022 թվականի դեկտեմբերի 24-ի ելույթի կարևորությունը՝ որպես այս գործընթացի քաղաքական աջակցություն»։

Բաքուն նմանատիպ մեկ այլ միջոցառում կազմակերպել էր նաև օրեր առաջ։

Նշենք, որ Բաքուն, այսպես կոչված, «Արևմտյան Ադրբեջանի» թեզն է առաջ մղում, որով փաթեթավորում է իր անհիմն ու կեղծ տարածքային պահանջները ՀՀ-ի նկատմամբ։ «Արևմտյան Ադրբեջան» ասելով՝ Ադրբեջանում ներկայացնում են ՀՀ տարածքը։ OC Media-ն ավելի վաղ հայտնել էր, որ իր ուսումնասիրած արտահոսած փաստաթղթերը բացահայտում են, թե ինչպես է Ադրբեջանի նախագահի աշխատակազմը համակարգել և ֆինանսավորել «Արևմտյան Ադրբեջան» նարատիվի միջազգային տարածումը։

Թարգմանությունը՝ Էմմա Չոբանյանի