Ռուսական զորքերը հարվածել են Խարկովին և Օդեսային․ Սումիում ընտանիքի անդամներ են զոհվել

Ռուսաստանի զինված ուժերի հարվածային անօդաչու թռչող սարքը հարվածել է Խարկովի Շևչենկովսկի շրջանի կենտրոնական հատվածում գտնվող բազմահարկ բնակելի շենքին, որի հետևանքով հրդեհ է բռնկվել։ Այս մասին քաղաքապետ Իգոր Տերեխովը հայտնել է տելեգրամում, գրում է DW-ի ռուսական ծառայությունը:

«Հարվածը գրանցվել է բազմահարկ շենքի 22-րդ հարկի ճակատային մասին»,- գրել է քաղաքապետը։

Ըստ նրա՝ հարվածից հետո ճակատային մասը հրդեհվել է՝ այրելով շուրջ տասը պատուհան։ Հրդեհն արագորեն մարվել է։ Նախնական տեղեկություններով՝ տուժածներ չկան։

Միաժամանակ, հունիսի 21-ի երեկոյան Ռուսաստանի զինված ուժերն «Իսկանդեր» բալիստիկ հրթիռով հարված են հասցրել Օդեսայի շրջանում գտնվող գյուղատնտեսական ձեռնարկության: Նախնական տվյալներով՝ մեկ մարդ զոհվել է, ևս երեքը՝ վիրավորվել, հայտնել է Օդեսայի տարածաշրջանային ռազմական վարչակազմի  ղեկավար Օլեգ Կիպերը: Հարձակման հետևանքով մեքենաներ և վառելիքի բաքեր են հրդեհվել: Այրվել է պահեստ:

Ռուսական անօդաչու թռչող սարքը հարվածել է նաև Զնոբ-Նովգորոդ համայնքի բնակելի շենքին, հայտնել է Սումիի մարզային ռազմական վարչակազմի ղեկավար Օլեգ Գրիգորովը։ Նրա տեղեկացմամբ՝ շենքում հրդեհ է բռնկվել։ Հարձակման վայրում զոհվել են 13-ամյա երեխա, նրա 36-ամյա հայրը և 73-ամյա տատիկը։

Վիրավորվել են ևս երկու երեխաներ՝ 10-ամյա տղա և 13-ամյա աղջիկ, ինչպես նաև նրանց մայրը։

Ավելի վաղ Ուկրաինայի նախագահ Վլադիմիր Զելենսկին հայտարարել էր, որ Կիևը համաձայնության է եկել Գերմանիայի հետ 600 ՀՕՊ հրթիռ գնելու վերաբերյալ։

«Մենք արդեն ստորագրել ենք նրանց (գերմանացի արտադրողների) հետ նշանակալի պայմանագիր՝ 600 հրթիռի համար»,- ասել էր Ուկրաինայի առաջնորդը ТСН.Неделя-ին տված հարցազրույցում։

Թարգմանությունը՝ Էմմա Չոբանյանի