ԿԸՀ-ն մերժեց «Ուժեղ Հայաստան»-ի գրանցումն անվավեր ճանաչելու՝ «Հանրապետության» դիմումը. ՏԵՍԱՆՅՈՒԹ

ԿԸՀ-ն մերժեց «Ուժեղ Հայաստան» կուսակցությունների դաշինքի ընտրական ցուցակի գրանցումը ուժը կորցրած ճանաչելու՝ «Հանրապետություն» կուսակցության դիմումը։

Հիշեցնենք, որ «Հանրապետություն» կուսակցությունը հունիսի 5-ին դիմել է Կենտրոնական ընտրական հանձնաժողով՝ պահանջելով անվավեր ճանաչել «Ուժեղ Հայաստան» կուսակցությունների դաշինքի ընտրական ցուցակի գրանցումը։

Հայաստանի Հանրային հեռուստաընկերության ուղիղ եթերում կազմակերպված առաջին դեմքերի բանավեճի ժամանակ Նիկոլ Փաշինյանը ընդդիմության առաջնորդներին կոչ էր արել այդ հարցով դիմել ԿԸՀ։

Մինչ այդ «Հանրապետություն» կուսակցության ղեկավար Արամ Սարգսյանը նշել էր, որ ինքը բանավոր դիմել է ԿԸՀ, որտեղից իրեն ասել են, թե դիմելն անիմաստ է, քանի որ ԿԸՀ-ն նման լիազորություններ չունի, ինչին ի պատասխան Փաշինյանը կոչ էր արել դիմել գրավոր։ Արամ Սարգսյանն իր հերթին խոստացել էր արդեն վաղը (այսինքն՝ այսօր) գրավոր դիմել ԿԸՀ։

Դիմումում նաև նշվել է, որ դաշինքի օգտին եղել են ընտրական գործընթացի վրա էական ազդեցություն գործադրելուն միտված արտաքին միջամտության դեպքեր, իսկ դաշինքի առաջին համարի թեկնածուի՝ ՀՀ քաղաքացիության վերաբերյալ առկա են սահմանադրական պահանջներին համապատասխանության կասկածներ, որոնց առնչությամբ նախաձեռնվել է քրեական վարույթ։ Բացի այդ, դիմումատուն հղում է կատարել մամուլի հրապարակումներին, ըստ որոնց՝ Հայաստան են ներթափանցել մեծածավալ դրամական միջոցներ, որոնք ենթադրաբար կապվում են դաշինքի հետ և կարող են օգտագործվել ընտրական գործընթացների վրա ազդելու նպատակով։

«Ուժեղ Հայաստան» կուսակցությունների դաշինքի ներկայացուցիչներ Արամ Վարդևանյանն ու Գոհար Մելոյանը ԿԸՀ նիստում հայտարարեցին, որ «Հանրապետություն» կուսակցության դիմումը չի պարունակում բավարար փաստական և իրավական հիմքեր, որոնք կվկայեն այնտեղ նշված խախտումների կամ մեղադրանքների առկայության մասին, և, ըստ նրանց, ներկայացված պնդումները հիմնավորված չեն համապատասխան ապացույցներով։

Արփի Հակոբյան

Մանրամասները՝ տեսանյութում։