Ռուսական դիզելային վառելիքով առաջին լցանավն ուղևորվել է դեպի ԱՄՆ

Մալթայի դրոշի ներքո նավարկող լցանավը՝ 40 հազար տոննա ռուսական դիզելային վառելիքով, ուղևորվում է դեպի Նյու Յորք։ Այս մասին հայտնում է Reuters-ը՝ վկայակոչելով LSEG-ի տվյալներին, գրում է BBC-ի ռուսական ծառայությունը։

Ռուսաստանը համաձայնել էր վերացնել դիզելային վառելիքի արտահանման՝ իր իսկ սահմանած արգելքը և վերսկսել մատակարարումները համաշխարհային շուկաներ, այդ թվում՝ ԱՄՆ։ Այս որոշումն ընդունվել է ԱՄՆ նախագահ Դոնալդ Թրամփի և Ռուսաստանի նախագահ Վլադիմիր Պուտինի հեռախոսազրույցից հետո։

Վաշինգտոնը կասեցրել է ռուսական դիզելային վառելիքի նկատմամբ պատժամիջոցների գործողությունը։ Ուկրաինայի նախագահ Վլադիմիր Զելենսկին դա անվանել է Պուտինին մատուցված անարդար նվեր, ինչի ֆոնին Կիևի և Վաշինգտոնի հարաբերությունները սրվել են։

Ըստ Reuters-ի՝ հոկտեմբերի 22-ին Լենինգրադի մարզի Պրիմորսկ նավահանգստում Agioi Fanende լցանավի վրա բեռնվել է ծծմբի չափազանց ցածր պարունակությամբ 40 հազար տոննա դիզելային վառելիք։ Սպասվում է, որ նավը ԱՄՆ կհասնի նոյեմբերի 7-ին։

Հոկտեմբերի 9-ին Թրամփը հայտարարել էր, որ Ռուսաստանը մոտ ապագայում կարտահանի 300 հազար տոննա դիզելային վառելիք՝ շուրջ 2,25 միլիոն բարել, նոյեմբերին կմատակարարի ևս 500 հազար տոննա, իսկ «դրանից անմիջապես հետո»՝ ևս 1 միլիոն տոննա։

ՌԴ նախագահի մամուլի քարտուղար Դմիտրի Պեսկովը հաստատել է, որ ռուսական դիզելային վառելիքով բեռնված առաջին լցանավն ուղարկվել է ԱՄՆ։

«Իմ կարծիքով՝ էներգետիկայի նախարարությունից արդեն տեղեկություններ էին հաղորդվել, որ առաջին լցանավը, ըստ էության, ուղևորվել է դեպի իր հասցեատերերն ու գնորդները, և հետագայում մատակարարումները կշարունակվեն կանոնավոր կերպով»,- լրագրողներին ասել է Պեսկովը։

Թարգմանությունը՝ Էմմա Չոբանյանի