Այս խորհրդարանը շատ շուտ սպառվելու է, 2 տարի անց նորից ընտրություններ կլինեն. Վարուժան Ավետիսյան. ՏԵՍԱՆՅՈՒԹ

«Շատ ցանկալի կլիներ, որ պարոն Սեֆիլյանը գլխավորեր մեր ցուցակը, նրա մեծ ճանաչումն ու հեղինակությունը որոշակի կարևոր գործոն են՝ մեր կուսակցության առաջընթացն ապահովելու համար: Բայց գաղտնիք չէ, որ նա փաստացի զբաղվում է քաղաքականությամբ։ Պարոն Սեֆիլյանը մեր շարժման լիդերն է և, կարծում եմ, տարբերությունը շատ մեծ չի լինի»,- այսօր Factor.am-ի հետ զրույցում ասաց «Սասնա Ծռեր» կուսակցության պատգամավորի թեկնածու Վարուժան Ավետիսյանը։

«Սասնա Ծռեր»-ի ցուցակը գլխավորող Ավետիսյանից տեղեկացանք, որ իրենք ընտրություններին կմասնակցեն «Ժամանակն է» կարգախոսով։ Նա բարձր է գնահատում կուսակցության շանսերը․«Մենք արդեն խորհրդարանում ենք»։ Վարուժան Ավետիսյանը, միաժամանակ, համաձայն չէ պնդումների հետ, թե իրենք ծայրահեղական են, ասում է՝ դա հակաքարոզի արդյունք է. «Մենք դա կարող ենք հանդուրժել, չընդունել, պարզապես փորձում են այնպես անել, որ մենք չանցնեք խորհրդարան, ինչն անհնարին է: Փորձում են լուծել հարցը, որպեսզի մենք հնարավորինս քիչ թվով պատգամավորներով ներկայացված լինենք»։

Վարուժան Ավետիսյանի պնդմամբ՝ այս խորհրդարանն անցումային է և կարճ ժամանակ անց կսպառի իրեն: Հենց այդ պատճառով էլ իրենց նախընտրական ծրագիրը երկամյա է. «Սա անցումային վիճակ է, մենք չունեցանք այն անցումային խորհրդարանը, որը կարող էինք ունենալ՝ ըստ մեր հեղափոխական ծրագրի: Բայց կյանքի պահանջներն օբյեկտիվ են, և մենք տեսնում ենք, որ այս խորհրդարանը սպառվելու է շատ շուտ»:

Անդրադառնալով հարցին, թե Պավել Մանուկյանի աղմկահարույց հարցազրույցից հետո արդյո՞ք հանդիպում կամ քննարկում եղել է, Վարուժան Ավետիսյանը պատասխանեց. «Ես դատարանում խոսել եմ Պավել Մանուկյանի հետ, ժամանակ և հնարավորություն չի եղել մանրամասն ամեն ինչի անդրադառնալու, բայց, իմ ներքին համոզմամբ, նորից մեր հարաբերությունները ջերմացնելու, նախկին վիճակին բերելու հնարավորություններ կան, և ուզում եմ, որ դրանք ամբողջությամբ վերականգնվեն, նախկին թյուրիմացական վիճակը հարթվի և մնա մոռացված անցյալի մի կտոր»։

Մանրամասները՝ տեսանյութում;

Լիլիթ Շաբոյան