Lufthansa-ն 20,000 չվերթ է չեղարկում՝ Հորմուզի նեղուցի շրջափակման ֆոնին ավիավառելիքի գների կրկնապատկման պատճառով

Գերմանական Lufthansa ավիաընկերությունը մայիսից հոկտեմբեր ամիսների իր չվացուցակից հանում է 20,000 կարճ չվերթ, ինչը համաշխարհային ավիացիայի ամենամեծ կրճատումներից է, հայտնում է Financial Times-ը։ Միաժամանակ, հոլանդական KLM ավիափոխադրողը չեղարկել է առաջիկա ամսվա 160 չվերթ, գրում է The Insider-ը։

Lufthansa-ն երկուշաբթի օրվանից սկսել է չեղարկել օրական շուրջ 120 չվերթ և մինչև հոկտեմբերի կեսերը փակում է Մյունխենից և Ֆրանկֆուրտից ոչ շահավետ երթուղիները։ Որպես որոշման պատճառ ընկերությունը նշել է իրանական հակամարտության սկզբից ի վեր ավիավառելիքի գների կրկնապատկումը։ Ընկերության տվյալներով՝ չեղարկված 20,000 չվերթը կխնայի շուրջ 40,000 տոննա վառելիք։ Ամառային հստակ չվացուցակը կհրապարակվի ապրիլի վերջին կամ մայիսի սկզբին։

Միջազգային էներգետիկ գործակալության (ՄԷԳ) տվյալներով՝ Եվրոպայում մնացել է շուրջ հինգ շաբաթվա ավիավառելիքի  պաշար։ Հորմուզի նեղուցի փակման ֆոնին աշխարհի ավիաընկերությունները կրճատում են երթուղիները կամ բարձրացնում տոմսերի գները։

Delta Air Lines-ն այս ամիս հայտարարեց ոչ շահութաբեր երթուղիների շուրջ 3,5%-ով կրճատման մասին՝ հույս ունենալով փոխհատուցել 1 միլիարդ դոլարի լրացուցիչ ծախսերը։ Ասիական ավիաընկերությունները՝ Cathay Pacific-ը, Air Asia X-ը և Air New Zealand-ը, նույնպես կրճատում են երթուղիները։ Աշխարհի ավիափոխադրողների մեծ մասը ներդրել է վառելիքի լրացուցիչ վճարներ կամ բարձրացրել տոմսերի գները։

Ապրիլի սկզբին ավիացիոն վառելիքի գինը մեկ տոննայի համար գերազանցում էր 1800 դոլարը, ինչը 120%-ով ավելին է նախաճգնաժամային մակարդակից։

Թարգմանությունը՝ Էմմա Չոբանյանի