4 «կողմ», 1 «դեմ», 1 «ձեռնպահ»․ ընտանեկան բռնության մասին նախագիծը դրական եզրակացություն ստացավ․ ՏԵՍԱՆՅՈՒԹ

Ազգային ժողովի Մարդու իրավունքների պաշտպանության և հանրային հարցերի մշտական հանձնաժողովի արտահերթ նիստում քննարկվեց և դրական եզրակացություն ստացավ «Ընտանեկան և կենցաղային բռնության կանխարգելման և ընտանեկան ու կենցաղային բռնության ենթարկված անձանց պաշտպանության մասին» օրենքում փոփոխություններ և լրացումներ կատարելու մասին օրենքի նախագիծը և կից փաթեթը։

Օրենսդրական նախաձեռնության հեղինակներն են ԱԺ պատգամավորներ Զարուհի Բաթոյանը, Սոնա Ղազարյանը և Ծովինար Վարդանյանը։ Փաթեթում ներառված են նաև պրոբացիայի և քրեակատարողական ոլորտներին առնչվող լրացուցիչ կարգավորումներ։

Մինչ բուն նախագծի քվեարկությունը՝ նիստում քննարկվեց հարցի քննարկումը հետաձգելու առաջարկը։ Ընդդիմադիր պատգամավորները պարզաբանեցին, որ նպատակ ունեին նախագիծը հետաձգել՝ միջազգային փորձագիտական եզրակացություն ստանալու նպատակով, և քանի որ առաջարկը չընդունվեց, իրենք չեն կարող «կողմ» արտահայտվել ներկայացված տարբերակին։

Այնուհետև հանձնաժողովը քվեարկությամբ հավանություն տվեց փաթեթում երկու լրացուցիչ նախագծերի ընդգրկմանը, որից հետո քվեարկության դրվեց հիմնական օրենսդրական փաթեթին դրական եզրակացություն տալու հարցը։

Քվեարկության արդյունքում նախագիծը ստացավ 4 «կողմ», 1 «դեմ» և 1 «ձեռնպահ» ձայն։ Նույն հարաբերակցությամբ հանձնաժողովը կողմ քվեարկեց նաև օրենսդրական նախաձեռնությունն Ազգային ժողովի առաջիկա հերթական նիստերի օրակարգի նախագծում ընդգրկելու առաջարկությանը։

Մանրամասները՝ տեսանյութում։

Ռոզա Վարդանյան