Սամվել Կարապետյանի գործը մակագրվել է դատավոր Վահե Դոլմազյանին

Սամվել Կարապետյանի գործը ապրիլի 3-ին մեղադրական եզրակացությամբ ուղարկել է Հակակոռուպցիոն դատարան։ Դատարանից հայտնում են, որ գործը մակագրվել է դատավոր Վահե Դոլմազյանին:

Վերջինս մինչև դատավոր ընտրվելը, որպես դատախազ ներգրավված է եղել քաղաքական հնչերանգ ունեցող մի շարք գործերում։ Օրինակ՝ եղել է գեներալ Մանվել Գրիգորյանի գործով դատախազը, Հայաստանի երկրորդ նախագահ Ռոբերտ Քոչարյանի գույքի վրա դրված կալանքի որոշման դեմ բողոքով քննությանն է որպես դատախազ մասնակցել, ինչպես նաև Քոչարյանին ազատ արձակած դատավոր Դավիթ Գրիգորյանի նկատմամբ հարուցված քրեական գործով է դատախազ եղել։ Վահե Դոլմազյանի վարույթում են քննվել կամ այժմ քննվում պաշտպանության նախկին նախարար Դավիթ Տոնոյանի, ԲԴԽ նախկին նախագահ Ռուբեն Վարդազարյանի, ՀՀԿ փոխնախաագահ Արմեն Աշոտյանի, Երևանի նախկին քաղաքապետ Երվանդ Զախարյանի և մի շարք այլ գործեր։

Դոլմազյանը նաև քննել է Սամվել Կարապետյանի կալանքի ժամկետը երկրարացնելու միջնորդություններից մեկը և մասնակի բավարարել քննիչի միջնորդությունը։

Հիշեցնենք, որ Քննչական կոմիտեն օրեր առաջ հայտարարություն է տարածել այն մասին, որ Կարապետյանի գործով նախաքննության ավարտ է հայտարարվել։ Քրեական վարույթը մեղադրական եզրակացությամբ ուղարկվել էր հսկող դատախազին՝ այն հաստատելու և քննության առնելու համար դատարան ուղարկելու միջնորդությամբ:

ՔԿ հայտարարության մեջ, մասնավորապես, նշված էր․ «ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչությունում ավարտվել է «Հայաստանի էլեկտրական ցանցեր» ՓԲ ընկերության սեփականատեր Ս.Կ.-ի, վերջինիս պատկանող ընկերությունների գործունեությունը ղեկավարած Վ.Թ.-ի և Ա.Խ.-ի կողմից առանձնապես խոշոր չափերով հարկեր վճարելուց խուսափելու, իրենց իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով խարդախությամբ առանձնապես խոշոր չափերով գույք հափշտակելու, առանձնապես խոշոր չափերով փողերի լվացման, իրավաբանական անձ օգտագործելու միջոցով ապօրինի գործունեություն իրականացնելու, ինչպես նաև Ս.Կ.-ի կողմից իշխանությունը զավթելուն, սահմանադրական կարգը բռնի տապալելուն ուղղված հրապարակային կոչեր հնչեցնելու դեպքերի առթիվ քննվող քրեական վարույթի նախաքննությունը:

Նախաքննության ընթացքում պարզվել է, որ «Հայաստանի էլեկտրական ցանցեր» ՓԲ ընկերության սեփականատեր Ս.Կ.-ն Հայաստանի Հանրապետությունում պետական գրանցում ստացած ՍՊ ընկերության փաստացի շահառուների՝ իրեն պատկանող «Հայաստանի էլեկտրական ցանցեր» ՓԲ ընկերության տնօրենների խորհրդի նախագահ Կ.Դ.-ի, տնօրեն Կ.Հ.-ի և ՓԲ ընկերության տնօրեն Ա.Խ.-ի հետ կազմակերպել և ղեկավարել է ընկերության տնօրեն Վ.Թ.-ի կողմից նախնական համաձայնությամբ առանձնապես խոշոր չափերով՝ 1 մլրդ 841 մլն 330 հզր 78 ՀՀ դրամ հարկեր վճարելուց խուսափելը, ինչպես նաև այլ ՍՊ ընկերությունների իրավասու անձանց ներգրավմամբ հիշյալ անձանց կողմից 2020-2023 թվականների ընթացքում նյութական օգուտներ ստանալու և ապօրինի գործունեությունը քողարկելու նպատակով նշված ընկերությունների օգտագործումը կազմակերպելու միջոցով, ծառայողական լիազորությունները և դրանցով պայմանավորված ազդեցությունն օգտագործելով, խաբեությամբ առանձնապես խոշոր չափերով՝ 4 մլրդ 972 մլն 955 հզր 628 ՀՀ դրամ հափշտակելը, այնուհետև նույն եղանակով օրինականացրել հանցավոր ծագում ունեցող առանձնապես խոշոր չափերով գույք:

Բացի այդ, Ս.Կ.-ն ՀՀ-ում պետական գրանցում ստացած ՓԲ ընկերության տնօրեններ Ր.Ն.-ի և Վ.Վ.-ի հետ նախնական համաձայնությամբ, նյութական օգուտներ ստանալու և ապօրինի գործունեությունը քողարկելու նպատակով նշված ընկերությունների օգտագործումը կազմակերպելու միջոցով, վերջիններիս կողմից ծառայողական լիազորությունների և դրանցով պայմանավորված ազդեցության օգտագործմամբ օրինականացրել է հանցավոր ծագում ունեցող և օրինական գործունեությամբ չհիմնավորվող՝ առանձնապես խոշոր չափերով 1 մլրդ 558 մլն 249 հզր 680 ՀՀ դրամ և 438 մլն 81 հզր 491 ՀՀ դրամ գումարը:

Բացի այդ, Ս.Կ.-ն 2025 թվականի հունիսի 17-ին հնչեցրել է իշխանությունը զավթելուն ուղղված հրապարակային կոչ:

Այսպիսով, Ս.Կ.-ի նկատմամբ հարուցվել է հանրային քրեական հետապնդում՝ 18.04.2003 թվականին ընդունված Քրեական օրենսգրքի 38-205-րդ հոդվածի 2-րդ մասով (հարկերը, տուրքերը կամ պարտադիր այլ վճարումները վճարելուց չարամտորեն խուսափելը կազմակերպելը), Քրեական օրենսգրքի 46-255-րդ հոդվածի 3-րդ մասի 3-րդ կետով (առանձնապես խոշոր չափերով խարդախությունը կազմակերպելը), 46-285-րդ հոդվածի 2-րդ մասի 1-ին, 2-րդ և 3-րդ կետերով (մի խումբ անձանց կողմից նախնական համաձայնությամբ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով ապօրինի գործունեություն իրականացնելու կամ ապօրինի գործունեությունը քողարկելու նպատակով իրավաբանական անձ, դրա առանձնացված ստորաբաժանում, հիմնարկ ստեղծելը կամ օգտագործելը կամ նույն նպատակով անհատ ձեռնարկատեր հաշվառելը կազմակերպելը, որը պատճառել է առանձնապես խոշոր չափերի գույքային վնաս) (2 դրվագ), 296-րդ հոդվածի 3-րդ մասի 2-րդ և 3-րդ կետերով (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով առանձնապես խոշոր չափերով փողերի լվացումը) (2 դրվագ) և 422-րդ հոդվածի 2-րդ մասով (զանգվածային լրատվության միջոցներն օգտագործելով իշխանությունը զավթելուն, սահմանադրական կարգը բռնի տապալելուն ուղղված հրապարակային կոչ հնչեցնելը):

Ա.Խ.-ի նկատմամբ հարուցվել է հանրային քրեական հետապնդում՝ 18.04.2003 թվականին ընդունված Քրեական օրենսգրքի 38-205-րդ հոդվածի 2-րդ մասով (հարկերը, տուրքերը կամ պարտադիր այլ վճարումները վճարելուց չարամտորեն խուսափելուն օժանդակելը), Քրեական օրենսգրքի 255-րդ հոդվածի 3-րդ մասի 3-րդ կետով (առանձնապես խոշոր չափերով խարդախությունը), 285-րդ հոդվածի 2-րդ մասի 1-ին, 2-րդ և 3-րդ կետերով (մի խումբ անձանց կողմից նախնական համաձայնությամբ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով ապօրինի գործունեություն իրականացնելու կամ ապօրինի գործունեությունը քողարկելու նպատակով իրավաբանական անձ, դրա առանձնացված ստորաբաժանում, հիմնարկ ստեղծելը կամ օգտագործելը կամ նույն նպատակով անհատ ձեռնարկատեր հաշվառելը, որը պատճառել է առանձնապես խոշոր չափերի գույքային վնաս) և 296-րդ հոդվածի 3-րդ մասի 2-րդ և 3-րդ կետերով (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով առանձնապես խոշոր չափերով փողերի լվացումը):

Վ.Թ.-ի նկատմամբ հարուցվել է հանրային քրեական հետապնդում՝ 18.04.2003 թվականին ընդունված Քրեական օրենսգրքի 205-րդ հոդվածի 2-րդ մասով (հարկերը, տուրքերը կամ պարտադիր այլ վճարումները վճարելուց չարամտորեն խուսափելը), Քրեական օրենսգրքի 255-րդ հոդվածի 3-րդ մասի 3-րդ կետով (առանձնապես խոշոր չափերով խարդախությունը), 285-րդ հոդվածի 2-րդ մասի 1-ին, 2-րդ և 3-րդ կետերով (մի խումբ անձանց կողմից նախնական համաձայնությամբ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով ապօրինի գործունեություն իրականացնելու կամ ապօրինի գործունեությունը քողարկելու նպատակով իրավաբանական անձ, դրա առանձնացված ստորաբաժանում, հիմնարկ ստեղծելը կամ օգտագործելը կամ նույն նպատակով անհատ ձեռնարկատեր հաշվառելը, որը պատճառել է առանձնապես խոշոր չափերի գույքային վնաս) և 296-րդ հոդվածի 3-րդ մասի 2-րդ և 3-րդ կետերով (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով առանձնապես խոշոր չափերով փողերի լվացումը):

Ս.Կ.-ի նկատմամբ որպես խափանման միջոց կիրառվել է տնային կալանքը, գրավը և բացակայելու արգելքը, Ա.Խ.-ի և Վ.Թ.-ի նկատմամբ՝ բացակայելու արգելքը, գրավը և վարչական հսկողությունը»։

Արաքս Մամուլյան