Թրամփի հայտարարած վերջնաժամկետը կլրանա չորեքշաբթի վաղ առավոտյան․ Գուտերեշը ԱՄՆ-ին հորդորում է չհարվածել Իրանում քաղաքացիական օբյեկտներին

ՄԱԿ-ի գլխավոր քարտուղար Անտոնիո Գուտերեշը կոչ է անում Միացյալ Նահանգներին և Իսրայելին չհարվածել Իրանի էլեկտրակայաններին և այլ քաղաքացիական ենթակառուցվածքներին: Նրա խոսնակ Ստեֆան Դյուժարիկը ապրիլի 6-ին Նյու Յորքում հայտարարել է, որ նման հարձակումները խախտում են միջազգային իրավունքը, գրում է DW-ի ռուսական ծառայությունը։

Դյուժարիկի խոսքով՝ «նույնիսկ եթե որոշակի քաղաքացիական ենթակառուցվածքներ կարող են դասակարգվել որպես ռազմական թիրախ, միջազգային մարդասիրական իրավունքը դեռևս արգելում է դրանց վրա հարձակումները», եթե սպասվում է քաղաքացիական բնակչությանը «չափազանց» շատ վնաս։ Նա նաև հավելել է, որ Գուտերեշի կարծիքով՝ «կողմերի համար վաղուց ժամանակն է վերջ դնել այս հակամարտությանը»։

ԱՄՆ նախագահ Դոնալդ Թրամփը սպառնացել է ոչնչացնել Իրանի բոլոր կամուրջներն ու էլեկտրակայանները իր վերջնագրի ժամկետը լրանալուց մի քանի ժամ անց։ Ապրիլի 6-ին Սպիտակ տանը ելույթ ունենալով՝ նա ասել էր, որ Միացյալ Նահանգները կարող է իրականացնել Իրանի «լիակատար ոչնչացումը» չորս ժամվա ընթացքում։

Թեհրանին ուղղված վերջնագրի ժամկետը, որը պահանջում է բացել Հորմուզի նեղուցը՝ համաշխարհային նավթի և գազի հիմնական երթուղին, լրանում է չորեքշաբթի վաղ առավոտյան Երևանի ժամանակով ժամը 4:00-ին։

Թրամփը նաև հերքել է այն մեղադրանքները, որ իրանական էլեկտրակայանների և կամուրջների վրա հարձակումները՝ մարտավարություն, որը Ռուսաստանը կիրառում է Ուկրաինայի դեմ իր պատերազմում, ռազմական հանցագործություն են։

«Դա ինձ չի անհանգստացնում», – ասել է  նա լրագրողներին։ Հարցին, թե ինչ կասեր նրանց, ովքեր էներգետիկ օբյեկտներին հարվածելը համարում են պատերազմի օրենքների խախտում, Թրամփը պատասխանել է. «Գիտե՞ք, թե ինչ է ռազմական հանցագործությունը։ Ռազմական հանցագործություն է Իրանին թույլ տալը ունենալ միջուկային զենք»։

Ամերիկայի նախագահը Իրանի առաջնորդներին անվանել էր  «կենդանիներ», որոնք սպանել են տասնյակ հազարավոր ցուցարարների: Թրամփը նաև հայտարարել էր, որ ինքը կնախընտրեր գրավել իրանական նավթը, բայց ամերիկացի ժողովուրդը, նրա խոսքով, «ուզում է, որ մենք տուն գնանք»: «Ես կպահեի նավթը և լավ շահույթ կստանայի», – հավելել է նա: ԱՄՆ նախագահը Իրանի հետ պատերազմին դեմ ամերիկացիներին անվանել է «հիմարներ»:

Թարգմանությունը`Էմմա Չոբանյանի