Մերձավանի միջադեպի հետևանքով վիրավորը վիրահատվել է, կյանքին վտանգ չի սպառնում․ մանրամասներ ՆԳՆ-ից

Մերձավանում տեղի ունեցած միջադեպի հետևանքով հիվանդանոց տեղափոխված Արծրուն Գալստյանը վիրահատվել է, նրա կյանքին վտանգ չի սպառնում: Այս մասին հայտնում են ՆԳՆ Ոստիկանությունից:

Արծրուն Գալստյանը նույնպես Ոստիկանության աշխատակից է, սակայն համայնքապետի տան մոտ հնչած կրակոցների ժամանակ ծառայության մեջ չի գտնվել: Ինչպես Գալստյանը, այնպես էլ կրակոցների հետևանքով սպանված ոստիկանության մյուս ծառայող Կարեն Աբրահամյանը ընկերական հարաբերություններ են ունեցել սպանված համայնքապետ Վալոդյա Գրիգորյանի հետ, և նրա հետ են եղել, երբ կրակոցներ են հնչել:

Նշենք, որ ըստ նախնական տեղեկությունների՝ կրակահերթ արձակած անձը եղել է դիմակավորված և ձեռնոցներով:

Հիշեցնենք, որ կեսգիշերին մոտ Մերձավանում՝ Փարաքարի համայնքապետ Վալոդյա Գրիգորյանի տան մոտ, կրակոցներ են հնչել, որի հետևանքով երկու անձ մահացել է, իսկ մեկը՝ տեղափոխվել հիվանդանոց:

Սպանվածներից մեկը Փարաքարի համայնքապետ Վալոդյա Գրիգորյանն է, մյուսը՝ Կարեն Միքայելյանը, որը ոստիկանության աշխատակից է, սակայն դեպքի պահին ծառայության մեջ չի գտնվել:

«Դեպքի առթիվ Արմավիրի մարզային քննչական վարչության Վաղարշապատի քննչական բաժնում ՀՀ քրեական օրենսգրքի 155-րդ հոդվածի 1-ին մասի (2 դրվագ) (սպանություն), 44-155-րդ հոդվածի 1-ին մասի (սպանության փորձ) և 335-րդ հոդվածի 1-ին մասի (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը) հատկանիշներով նախաձեռնվել է քրեական վարույթ։