12.01.2026 | 19:53
Մեկնարկում է շախմատի Հայաստանի առաջնությունը․ առաջին տուրի զույգերը հայտնի են
Փարաքարի ընդդիմադիր համայնքապետի ու ևս մեկ անձի սպանության դեպքով վարույթ է նախաձեռնվել
Հասարակություն
24.09.2025 | 09:54
Փարաքարի համայնքապետ Վալոդյա Գրիգորյանի ու ևս մեկ անձի սպանության դեպքի առթիվ նախաձեռնվել է քրեական վարույթ։ Այս մասին Factor TV-ին հայտնում են Քննչական կոմիտեից։
«Դեպքի առթիվ Արմավիրի մարզային քննչական վարչության Վաղարշապատի քննչական բաժնում ՀՀ քրեական օրենսգրքի 155-րդ հոդվածի 1-ին մասի (2 դրվագ) (սպանություն), 44-155-րդ հոդվածի 1-ին մասի (սպանության փորձ) և 335-րդ հոդվածի 1-ին մասի (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը) հատկանիշներով նախաձեռնվել է քրեական վարույթ։ Նախաքննության ընթացքում նշանակվել են դատաբժշկական փորձաքննություններ: Կատարվում են ապացուցողական և վարութային գործողություններ»,- տեղեկացրեցին Կոմիտեից:
Հիշեցնենք, որ կեսգիշերին մոտ Մերձավանում՝ Փարաքարի համայնքապետ Վալոդյա Գրիգորյանի տան մոտ, կրակոցներ են հնչել, որի հետևանքով երկու անձ մահացել է, իսկ մեկը՝ տեղափոխվել հիվանդանոց: Սպանվածներից մեկը Փարաքարի համայնքապետ Վալոդյա Գրիգորյանն է, մյուսը՝ Կարեն Աբրահամյանը, որը ոստիկանության աշխատակից է, սակայն դեպքի պահին ծառայության մեջ չի գտնվել:
Նշենք, որ Վալոդյա Գրիգորյանը Փարաքարի համայնքապետի էր ընտրվել 2025-ի մարտին, ընդդիմադիր «Ապրելու երկիր» կուսակցությունից էր:
Արաքս Մամուլյան
