Ովքեր հեռացան ՔՊ վարչությունից. Փաշինյանին դեմ քվեարկողներ են եղել. ՏԵՍԱՆՅՈՒԹ

Նիկոլ Փաշինյանը երկրորդ անգամ ստանձնեց իշխող ուժի վարչության նախագահի պաշտոնը։ Պարզվում է՝ ոչ բոլոր ՔՊ-ականներն են կողմ Փաշինյանին տեսնել կուսակցության ղեկին։ Շաբաթ օրը 80 ՔՊ-ականներ փակ քվեարկության ժամանակ այլ անձի են ընտրել վարչության ղեկավարի պաշտոնում։

Նիկոլ Փաշինյանը, հավանաբար, այդպես էլ չի իմանա, թե ովքեր են դեմ իր՝ կուսակցության նախագահ դառնալուն, քանի որ ՔՊ-ականները հրապարակավ մի մարդու նման կուսակցության ղեկին պատկերացնում են միայն Փաշինյանին։

«Ես ոչ մի անգամ վարչության նախագահի թեկնածու չեմ էղել և հույս ունեմ, որ չեմ էլ լինի: Իմ մտադրությունը և նպատակը դա ա, որովհետև կարծում եմ, որ դա հակակշիռների, փոխզսպումների ձևավորման առումով ճիշտ մեխանիզմը դա ա, և ես կարծում եմ, որ մեր կուսակցության մեջ տասնյակ մարդիկ կան, ովքեր արժանիորեն կարող են այդ կարգավիճակը ունենալ»,- Factor TV-ի հարցին ի պատասխան՝ դեռևս 2019 թվականին վստահեցրել էր Նիկոլ Փաշինյանը։ Իսկ հիմա ո՞վ է ռիսկ անելու հակակշռելու և զսպելու վարչապետին, երբ նրա լուսանկարները փակցված են բոլոր ՔՊ-ականների աշխատասենյակներում, համագումարի օրը Factor TV-ն հարցրեց Փաշինյանին։

Նիկոլ Փաշինյանը վարչության անդամ դառնալու համար ստացել է 826 քվե, քվեարկության իրավունք է ունեցել 917 ՔՊ-ական: Եթե վարչության նախագահի պաշտոնում Փաշինյանն անցանկալի է եղել 80 ՔՊ-ականի համար, ապա վարչության կազմում նրան տեսնել չի ցանկացել շուրջ 10 կուսակցական։ Նիկոլ Փաշինյանից հետո ՔՊ-ում ամենաբարձր վարկանիշը Գևորգ Պապոյանն ունի։ Նրա օգտին քվեարկել է 707 կուսակցական։ ՔՊ-ում իր դիրքերը զիջել է պաշտպանության նախարար Սուրեն Պապիկյանը։ Նա չորրորդն է, այնինչ նախորդ համագումարում զիջում էր միայն Փաշինյանին։

ՔՊ-ն այս համագումարին նոր քվոտա է սահմանել, ինչը վարչությունից դուրս է թողել հնաբնակարներին։ Կուսակցության սահմանած քվոտայով վարչության անդամներից առնվազն 5-ը պետք է լինեն հակառակ սեռի ներկայացուցիչներ։ Սա հանգեցրել է նրան, որ 416 քվե ստացած Սասուն Միքայելյանը վարչության կազմ չի ընդգրկվել, նրա փոխարեն նախապատվությունը տրվել է 405 ձայն ստացած Արուսյակ Մանավազյանին:

Նախորդ կազմից նոր վարչությունում չեն հայտնվել նաև Երևանի փոխքաղաքապետ Արմեն Փամբուխչյանը և ԱԺ պատգամավոր Վաղարշակ Հակոբյանը։ ՔՊ վարչության նորեկներն են Հայկ Կոնջորյանը, Վիլեն Գաբրիելյանը, Հասմիկ Հակոբյանը, Ալխազ Ղազարյանը, Արուսյակ Ջուլհակյանը, Արմեն Խաչատրյանը, Նազելի Բաղդասարյանը և Արուսյակ Մանավազյանը։ Հնաբնակներից վերընտրվել են Ալեն Սիմոնյանը, Գևորգ Պապոյանը, Գնել Սանոսյանը, Տիգրան Ավինյանը, Արայիկ Հարությունյանը, Սուրեն Պապիկյանը, Ռոմանոս Պետրոսյանը, Վահագն Ալեքսանյանը, Արսեն Թորոսյանը, Դավիթ Խուդաթյանը, Ռուբեն Ռուբինյանը և Վահագն Ալեքսանյանը։

ԱԺ փոխնախագահ Հակոբ Արշակյանին էլ հնարավորություն չի տրվել մասնակցել ՔՊ համագումարին, քանի որ, ինչպես պարզվեց, ուշ է փոխանցել կուսակցության անդամավճարը, որն էլ սահմանված ժամկետում չի նստել ՔՊ հաշվին։

Մանրամասները՝ տեսանյութում։

Նարեկ Կիրակոսյան