03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
ՀՀ-ն 45,3 մլն եվրո վարկ կստանա բժշկական ծառայությունների բարելավման համար. ԱՆ փոխնախարար․ ՏԵՍԱՆՅՈՒԹ
Տնտեսություն
01.09.2025 | 11:55
Առողջապահության զարգացման նպատակով Ասիական զարգացման բանկի հետ ավելի քան 45 միլիոն եվրոյի չափով վարկային համաձայնագիր կկնքվի։ Հարցն այսօր քննարկվեց ԱԺ ֆինանսավարկային և բյուջետային հարցերի մշտական հանձնաժողովի նիստում։
Զեկուցող առողջապահության փոխնախարար Լենա Նանուշյանը հայտնեց, որ Ասիական զարգացման բանկի կողմից առաջարկվող վարկավորման ծրագրով նախատեսվում է ներգրավել 45,3 մլն եվրո արժողությամբ վարկ՝ բժշկական ծառայությունների բարելավման համար։
«Վարկային միջոցները բաշխված են տարիների մեջ, և մենք մինչև 2028 թվականը պետք է կարողանանք ապահովել ամեն մի արդյունքային ցուցանիշի դրական ելքը, որի պարագայում հաջորդ տարվա ընթացքում վարկային միջոցները կտրամադրվեն»,- պարզաբանեց Նանուշյանը։
Փոխնախարարը մանրամասնեց, որ վարկային միջոցներն ուղղվելու են առողջապահական հաստատությունների կառուցման ու բարելավման, ծառայությունների որակի գնահատման, բժշկական հաստատությունների լիցենզավորման, առողջապահության ոլորտի մարդկային կապիտալի զարգացման, հեռաբժշկության պիլոտային ծրագրի իրականացման, ինչպես նաև էլեկտրոնային առողջապահության գործիքների կիրառության բարելավման խթանմանը:
Հիշեցնենք, որ կառավարությունը հունվարի 23-ի նիստում հավանություն է տվել Ասիական զարգացման բանկի հետ առողջապահական համակարգի զարգացմանն ուղղված վարկային համաձայնագրի ստորագրման առաջարկությանը։
Մանրամասները՝ տեսանյութում։
Մանյա Պողոսյան
