31.07.2026 | 00:19
Կոնֆերենցիաների լիգա. «Ալաշկերտը» 10 ֆուտբոլիստով պարտվեց «Կլուժին»
Երևանի մայթերը` ինքնագլորների երթուղի. օրենք կա, վերահսկողություն չկա․ ՏԵՍԱՆՅՈՒԹ
Հասարակություն
27.08.2025 | 20:30
Երևանում մայթով քայլելիս հաճախ կարող եք ինքնագլորի բախվել, մինչդեռ օրենքով ինքնագլորները պետք է շարժվեն հեծանվային ուղիներով, դրանց բացակայության դեպքում՝ ճանապարհի երթևեկելի մասի առաջին գոտիով։ Արգելվում է դրանք վարել թունելներում կամ թաց ծածկույթով ճանապարհներին։ Կանոնները խախտելու դեպքում սահմանված է 5000 դրամ տուգանք։
Թեև մշակվեցին օրենսդրական կարգավորումներ անհատական շարժունակության միջոցների համար և սահմանվեց տուգանք, սակայն ոստիկանությունը, ըստ «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանի, վարչարարություն և պատշաճ իրազեկում չի իրականացնում։
Անհատական շարժունակության միջոց վարելու իրավունք ունեն 18 տարին լրացած անձինք, ինչպես նաև 16 տարին լրացած այն անձինք, որոնք «AM» ենթակարգի տրանսպորտային միջոց վարելու իրավունք ունեն։ Սակայն մեր նկարահանումների ընթացքում արձանագրել ենք, որ անչափահասները ևս շարունակում են ինքնագլորներով տեղաշարժվել։ Մայթերին, բացի ինքնագլորներից և հեծանիվներից, հաճախ նաև մոպեդներ ենք տեսնում։
Անհատական շարժունակության միջոցները վարձակալությամբ տրամադրող կազմակերպությունների համար նախատեսվում է պարտավորություն, որպեսզի բացառեն այդ միջոցները 25 կմ/ժ-ից ավելի արագությամբ վարելը։ Սեպտեմբերի 1-ից նախատեսվում է նաև նվազագույն աշխատավարձի 29-ապատիկի չափով տուգանք, եթե անհատական շարժունակության միջոցն արագությունը չափող սարքավորմամբ կահավորված չէ։
Արգելվում է անհատական շարժունակության միջոցով տեղափոխել ուղևորի կամ բեռ՝ բացառությամբ վարողի կողմից առանց ձեռքերի օգտագործման պահվող ուղեբեռի, օրինակ՝ ուսապարկ: Ապրանքների առաքում իրականացնող հեծանվորդների կամ մոպեդների վարորդների կողմից հեծանիվը կամ մոպեդն առանց սաղավարտի կամ չկոճկած սաղավարտով վարելու համար նախատեսվում է տուգանք՝ 7000 դրամի չափով։ Սակայն մեր նկարահանման ընթացքում արձանագրեցինք, որ այս կանոնները ևս պատշաճ չեն պահպանվում։
Մանրամասները՝ տեսանյութում։
Անի Թամրազյան
