Քաղաքականություն
16.07.2025 | 12:18
ՌԴ Խաբարովսկի երկրամասում հայտնաբերվել են անհետացած Մի-8 ուղղաթիռի մնացորդները։ Այս մասին հայտնել է ՌԴ Արտակարգ իրավիճակների նախարարության մամուլի ծառայությունը, գրում է ՌԻԱ Նովոստին։
Ուղղաթիռն անհետացել էր երկուշաբթի երեկոյան, երբ վերանորոգումից հետո թռչում էր տեղակայման վայր։
«Օդային հետախուզության ընթացքում Ռոսավիացիայի ուղղաթիռը հայտնաբերել է հուլիսի 14-ին Օխոտսկից Մագադան թռչող Մի-8 ուղղաթիռի կործանման վայրը։ Բեկորները հայտնաբերվել են Խաբարովսկի երկրամասում՝ Գադիկանի հրվանդանի տարածքում»,- ասվում է հաղորդագրության մեջ։
Տրանսպորտի քննչական կոմիտեի տարածաշրջանային վարչության տվյալներով՝ ուղղաթիռն ամբողջությամբ ոչնչացվել է։ Օդանավում եղել է հինգ մարդ։ Հարուցվել է գործ՝ երթևեկության անվտանգության կանոնների խախտման և օդանավի շահագործման հոդվածով, որի հետևանքով զոհվել է երկու կամ ավելի մարդ։
Քննչական մարմինների աղբյուրը հայտնել է, որ ուղղաթիռի վթարային ռադիոազդանշանը չի աշխատել: Շրջանի արտակարգ իրավիճակների դիսպետչերական ծառայությունը նշել է, որ աղետի ազդանշան նույնպես չի եղել։
Խաբարովսկի երկրամասում Մի-8 ուղղաթիռի վթարից ողջ մնացածներ չկան, ՏԱՍՍ-ին հայտնել են ՌԴ ԱԻՆ մամուլի ծառայությունից։
«Ռոսավիացիայի տվյալներով՝ ողջ մնացածներ չկան։ Ռուսաստանի արտակարգ իրավիճակների նախարարության փրկարարները, քննչական մարմինների ներկայացուցիչների հետ համատեղ, կանցկացնեն վթարի վայրի, ինքնաթիռի մնացորդների զննում, կփնտրեն թռիչքի ինքնագրիչները՝ ավիաաղետի հանգամանքները պարզելու համար»,- հայտնել են մամուլի ծառայությունից։
Թարգմանությունը՝ Էմմա Չոբանյանի
