05.04.2026 | 21:04
Թրամփը կրկին սպառնում է հարվածներ հասցնել Իրանի էլեկտրակայաններին և կամուրջներին
ԱՄՆ-ի կողմից Ուկրաինային զենքի մատակարարումները վերսկսվել են․ Զելենսկի
Քաղաքականություն
12.07.2025 | 12:13
Միացյալ Նահանգները վերսկսել է Ուկրաինային զենքի մատակարարումները, ուրբաթ՝ հուլիսի 11-ին, ուկրաինացիներին ուղղված ամենօրյա տեսաուղերձում հայտարարել է Ուկրաինայի նախագահ Վլադիմիր Զելենսկին․ գրում է DW-ի ռուսական ծառայությունը։
«Մենք ունենք քաղաքական ազդանշաններ ամենաբարձր մակարդակով՝ լավ ազդանշաններ, հատկապես ԱՄՆ-ից, մեր եվրոպացի ընկերներից։ Բոլոր հաղորդագրությունների համաձայն՝ մատակարարումները վերսկսվել են», – ասել է նա։
Զելենսկին չի մանրամասնել, թե որ համակարգերն են մատակարարվում ԱՄՆ-ից։ «Մենք նաև պատրաստում ենք եվրոպական պաշտպանության նոր փաթեթներ», – հավելել է Ուկրաինայի ղեկավարը։
Հուլիսի 1-ին Politico-ն՝ հղում անելով Սպիտակ տանը, հաղորդել էր, որ Պենտագոնը դադարեցրել է Patriot զենիթային հրթիռների և այլ ճշգրիտ կառավարվող զինամթերքի մատակարարումը Ուկրաինային՝ այն մտահոգությունների պատճառով, որ ԱՄՆ-ն ինքն է չափազանց շատ կրճատել այդ զենքի պաշարները։
Միևնույն ժամանակ, CBS-ը հաղորդել էր, որ ԱՄՆ-ն դադարեցրել է զենքի և զինամթերքի մատակարարումները ոչ միայն Ուկրաինային, այլև որ այս որոշումը Պենտագոնի կողմից ԱՄՆ-ից զենք ստացող բոլոր երկրների վերաբերյալ անցկացվող ավելի լայնածավալ վերանայման մաս է կազմում։
Հուլիսի 8-ին ԱՄՆ նախագահ Դոնալդ Թրամփը հայտարարել էր, որ հաստատել է ամերիկյան պաշտպանական զենքի առաքումը Ուկրաինա։ Հուլիսի 10-ին Reuters-ը, հղում անելով ԱՄՆ պաշտոնյաներին, հաղորդել էր, որ ԱՄՆ-ն վերսկսել է 155 միլիմետրանոց հրետանային արկերի և GMLRS շարժական հրթիռների մատակարարումները։
Թարգմանությունը՝ Անահիտ Խաչատրյանի
