06.10.2026 | 14:41
Հայտնի է ֆիզիկայի ոլորտում Նոբելյան մրցանակի դափնեկիրը
Թրամփը հաստատել է, որ Սպիտակ տունը դիտարկում է Ուկրաինային Patriot համակարգ փոխանցելու հնարավորությունը
Քաղաքականություն
10.07.2025 | 12:45
ԱՄՆ նախագահ Դոնալդ Թրամփը լրագրողների հետ զրույցում հաստատել է, որ Սպիտակ տունը քննարկում է Patriot հակաօդային պաշտպանության համակարգն Ուկրաինային փոխանցելու հնարավորությունը, փոխանցում է Current time-ը։
«Ուկրաինա են ուղարկվել բազմաթիվ համակարգեր, բայց նրանք կցանկանային դա։ Գիտեմ, որ նրանք դիմել են։ Մենք պետք է քննարկենք։ Դա շատ թանկ համալիր է։ Եվ շատ ցավալի է, որ մենք ստիպված ենք այդքան շատ գումար ծախսել պատերազմի վրա, որը տեղի չէր ունենա, եթե ես նախագահ լինեի»,- հայտարարել է նա։
Թրամփը հավելել է, որ Ուկրաինային «շատ ուժեղ հարվածում են», ուստի Սպիտակ տունը «կդիտարկի դա»։
Այն մասին, որ Սպիտակ տունը քննարկում է Patriot հակաօդային պաշտպանության համակարգը Կիևին փոխանցելու հարցը, գրել էր Wall Street Journal-ը։ Լրատվամիջոցի տվյալներով՝ դեռևս որոշում չի կայացվել: Թրամփի խոսքերից նաև պարզ չէ, թե ինչ որոշում կարող է կայացնել Միացյալ Նահանգները:
Axios-ը հաղորդում է, որ Վաշինգտոնը համակարգի փոխանցումը քննարկում է նաև Բեռլինի հետ:
Զենքի մատակարարումների և հակաօդային պաշտպանության ամրապնդման հարցերը հուլիսի 9-ին Հռոմում՝ Ուկրաինայի վերակառուցման վերաբերյալ կոնֆերանսի ժամանակ քննարկել են Ուկրաինայի նախագահ Վլադիմիր Զելենսկին և Թրամփի հատուկ ներկայացուցիչ Քիթ Քելլոգը։
«Քննարկել ենք զենքի մատակարարումները և ՀՕՊ-ի ամրապնդումը։ Ռուսաստանի կողմից հարձակումների աճի ֆոնին սա առաջնահերթություններից մեկն է։ Մենք նաև խոսել ենք ամերիկյան զենքի գնման, համատեղ պաշտպանական արտադրության և Ուկրաինայում տեղայնացման մասին»,- հանդիպումից հետո ասել է Ուկրաինայի նախագահը։
Reuters-ն ու Associated Press-ն էլ հայտնում են, որ Թրամփի վարչակազմն արդեն վերսկսել է Ուկրաինային որոշ տեսակի զինամթերքի մատակարարումները։ Մասնավորապես, խոսքը 155 միլիմետրանոց արկերի և GMLRS անունով հայտնի ճշգրիտ կառավարվող հրթիռների մասին է։ Axios-ն էլ նախկինում հաղորդել էր, որ Թրամփը Զելենսկիին խոստացել է Կիևին անհապաղ ուղարկել 10 հրթիռ՝ Patriot հակաօդային պաշտպանության համակարգերի համար։
Թարգմանությունը՝ Էմմա Չոբանյանի
