ԱՄՆ-ն աջակցում է Հարավային Կովկասում խաղաղության ու կայունության ջանքերին․ Պետդեպ

Միացյալ Նահանգներն աջակցում է Հարավային Կովկասում խաղաղության և կայունության խթանման ջանքերին։ Այս մասին հայտարարել է ԱՄՆ Պետքարտուղարության մամուլի խոսնակ Թեմի Բրյուսը։

Նա ճեպազրույցում անդրադարձել է ադրբեջանցի լրագրողի դիտարկմանը, որ վերջերս պետքարտուղար Մարկո Ռուբիոն ասել էր՝ հույս ունի շուտով տեսնել Հայաստանի և Ադրբեջանի միջև խաղաղության համաձայնագիր, և Ադրբեջանի նախագահ Իլհամ Ալիևը և Հայաստանի վարչապետ Նիկոլ Փաշինյանը հանդիպել են Աբու Դաբիում։ Լրագրողը հետաքրքրվել է՝ կա՞, արդյոք, որևէ կապ պետքարտուղար Ռուբիոյի խոսքերի ու այս հանդիպման միջև և արդյո՞ք Վաշինգտոնն այժմ ունի որևէ կոնկրետ ծրագիր կամ առաջարկ՝ աջակցելու Հայաստանի և Ադրբեջանի միջև խաղաղության համաձայնագրին։

«Խաղաղության գործընթացի վերաբերյալ, Միացյալ Նահանգներն աջակցում է Հարավային Կովկասում խաղաղության և կայունության խթանման ջանքերին: Մենք նաև հետևում ենք մամուլի հաղորդագրություններին և չունենք որևէ լրացուցիչ տեղեկատվություն՝ փոխանցելու համար։ Բայց կարծում եմ, որ նախագահ Թրամփի վարչակազմի և պետքարտուղար Ռուբիոյի մոտեցումն ինքնին խոսուն է, և նրա դիտարկումները կաբինետի նիստում այն էին, որ այս վարչակազմն աշխատում է խաղաղության համար։ Նրանք կանեն այն, ինչ անհրաժեշտ է, և կգնան այնտեղ, որտեղ անհրաժեշտ է։ Դա չի նվազել, որովհետև «Ամերիկան ​​կրկին մեծ դարձնելու» հանձնառության հիմքում է ընկած մեզ շրջապատող աշխարհի իրավիճակի բարելավումը»,- ասել է Բրյուսը։

Հիշեցնենք, որ ԱՄՆ պետքարտուղար Մարկո Ռուբիոն ավելի վաղ հույս էր հայտնել շուտով Ադրբեջանի և Հայաստանի միջև խաղաղության համաձայնագրի կնքման։

Նախօրեին էլ Աբու Դաբիում տեղի է ունեցել ՀՀ վարչապետ Նիկոլ Փաշինյանի ու Ադրբեջանի նախագահ Իլհամ Ալիևի հանդիպումը։

Թարգմանությունը՝ Էմմա Չոբանյանի