Թրամփը մաքսատուրքեր է սահմանել ևս մի քանի երկրի նկատմամբ․ 50% Բրազիլիայի դեպքում՝ նախկին նախագահի դեմ «վհուկների որսի» պատճառով

ԱՄՆ նախագահ Դոնալդ Թրամփը նախօրեին ութ երկրի կառավարությունների տեղեկացրել է Միացյալ Նահանգներ ապրանքների ներմուծման համար նոր մաքսատուրքերի սահմանման մասին: Նա TruthSocial-ում հրապարակել է գրեթե նույնական նամակներ՝ ուղղված Մոլդովային, Ֆիլիպիններին, Բրունեյին, Ալժիրին, Լիբիային, Իրաքին և Շրի Լանկային, գրում է DW-ի ռուսական ծառայությունը։

Փաստաթղթերի համաձայն՝ Ալժիրի, Լիբիայի, Շրի Լանկայի և Իրաքի համար կսահմանվեն 30 տոկոս, Մոլդովայի և Բրունեյի համար՝ 25 տոկոս, իսկ Ֆիլիպինների համար՝ 20 տոկոս ներմուծման մաքսատուրքեր: Դրանք ուժի մեջ կմտնեն օգոստոսի 1-ից:

Բացի այդ, Դոնալդ Թրամփը հայտարարել է Բրազիլիայից ներմուծվող ապրանքների համար 50 տոկոս մաքսատուրք սահմանելու մասին: Որպես այս որոշման պատճառ նա նշել է այդ երկրի նախկին նախագահ Ժաիր Բոլսոնարոյի նկատմամբ քրեական հետապնդումը և Բրազիլիայում ամերիկյան հարթակների «գրաքննությունը»: Բրազիլիայի գործող նախագահ Լուլա դա Սիլվային ուղղված ուղերձում Թրամփը Բոլսոնարոյի դեմ դատավարությունն անվանել է «վհուկների որս, որը պետք է անհապաղ դադարեցվի»:

Բոլսոնարոն անցնում է ենթադրյալ պետական ​​հեղաշրջման փորձի գործով։

Ընտրություններում Լուլա դա Սիլվային պարտվելուց հետո Ժաիր Բոլսոնարոյի կողմնակիցները 2023 թվականի հունվարի 1-ին գրոհել էին Կոնգրեսի և Գերագույն դատարանի շենքերը, ինչպես նաև նախագահական նստավայրը։ Բրազիլիայում տեղի ունեցած անկարգությունները հիշեցնում են 2021 թվականի հունվարի 6-ին Թրամփի կողմնակիցների կողմից Կապիտոլիումի գրոհը նախագահական ընտրություններում նրա պարտությունից հետո։

Դոնալդ Թրամփը ապրիլի 4-ին հայտարարել էր, որ աշխարհի գրեթե բոլոր երկրների նկատմամբ մասշտաբային մաքսատուրքեր կսահմանի։ Ավելի ուշ նա հայտնել էր, որ 90 օրով հետաձգում է դրանք, որի ժամկետը լրացել է հուլիսի 8-ին։

Հավելենք, որ օրերս էլ Թրամփը հայտարարել էր 14 երկրի նկատմամբ օգոստոսի 1-ից մաքսատուրքերի սահմանման մասին և նամակներ ուղարկել այդ երկրների ղեկավարներին։

Թարգմանությունը՝ Էմմա Չոբանյանի