30.05.2026 | 17:38
ՆԱՏՕ-ի ԽՎ գարնանային նստաշրջանը մեկնարկել է Վիլնյուսում․ մասնակցում է նաև ՀՀ պատվիրակությունը
Ադրբեջանի և ԱՄԷ-ի նախագահները հանդիպել են Աբու Դաբիում. համապարփակ տնտեսական գործընկերության համաձայնագիր է ստորագրվել
Քաղաքականություն
09.07.2025 | 19:37
Աբու Դաբիում այսօր տեղի է ունեցել Ադրբեջանի նախագահ Իլհամ Ալիևի և Արաբական Միացյալ Էմիրությունների նախագահ Շեյխ Մոհամմեդ բին Զայեդ Ալ Նահյանի հանդիպումը։ Ադրբեջանական լրատվամիջոցները հաղորդում են, որ զրույցի ընթացքում ընդգծվել է՝ «Ադրբեջանի և Արաբական Միացյալ Էմիրությունների միջև բարեկամության ու եղբայրության վրա հիմնված հարաբերությունները կրում են ռազմավարական գործընկերության բնույթ, երկու երկրների միջև քաղաքական կապերը գտնվում են բարձր մակարդակի վրա, իսկ տնտեսական և առևտրային համագործակցությունը զարգանում է»։
Հանդիպմանը մտքեր են փոխանակվել երկկողմ հարաբերությունների վերաբերյալ, նշվել է երկու երկրների միջև էներգետիկայի, այդ թվում՝ վերականգնվող էներգիայի աղբյուրների ոլորտում հաջող համագործակցությունը, քննարկվել են այդ ոլորտում հեռանկարային նախագծերը։ Գոհունակություն է հայտնվել SOCAR-ի և ADNOC-ի, ինչպես նաև Ադրբեջանի և Masdar ընկերության միջև վերականգնվող էներգիայի աղբյուրների ոլորտում համագործակցության վերաբերյալ։
Զրույցի ընթացքում անդրադարձ է կատարվել գրավյալ Արցախի մայրաքաղաք Ստեփանակերտում կայացած Տնտեսական համագործակցության կազմակերպության գագաթնաժողովի կարևորությանը, նշվել է Արաբական Միացյալ Էմիրությունների բարձր ներկայացուցչությունը այդ միջոցառմանը։
Երկու երկրների նախագահների մասնակցությամբ ստորագրվել է «Ադրբեջանի Հանրապետության կառավարության և Արաբական Միացյալ Էմիրությունների կառավարության միջև համապարփակ տնտեսական գործընկերության մասին համաձայնագիրը»։
Հիշեցնենք, որ ԱՄԷ-ում է նաև ՀՀ վարչապետ Նիկոլ Փաշինյանը։ Վաղը սպասվում է Հայաստանի և Ադրբեջանի ղեկավարների հանդիպումը։
Թարգմանությունը՝ Էմմա Չոբանյանի
