Քաղաքականություն
09.07.2025 | 19:14
ՌԴ ԱԳՆ պաշտոնական ներկայացուցիչ Մարիա Զախարովան այսօր ճեպազրույցում անդրադարձել է Ուկրաինային Բաքվի կողմից զենքի հնարավոր վաճառքի թեմային ՝ պատասխանելով հարցին, որ ռուսական տելեգրամ ալիքներում հայտնվել էին փաստաթղթեր՝ «Ուկրսպեցէքսպորտ»-ի և Ադրբեջանի միջև կնքված պայմանագրերի վերաբերյալ։
«Ես չեմ կարող հիմնվել որոշ տելեգրամ ալիքների վրա, որոնք նկարագրում են Ուկրաինայում ինչ-որ բան։ Ես կխոսեմ ընդհանուր առմամբ, առանց երկրի անվան։ Անկախ նրանից, թե որ երկրի, պետական մակարդակի նահանգի կամ մասնավոր բիզնեսի մասին է խոսքը, մեր դիրքորոշումն այս հարցում լավ հայտնի է Կիևի ահաբեկչական ռեժիմին։ Դրան վերաբերող ցանկացած տեղեկատվություն, այդ թվում՝ այս հաղորդագրությունները, մանրամասն ստուգվում են», – ասել է Զախարովան։
Նա նշել է, որ եթե խոսքը «ոչ բարյացակամ ռեժիմների» մասին է, ապա կա մեկ իրավիճակ։ Եթե խոսքը այն երկրների մասին է, որոնց հետ Ռուսաստանը վստահության վրա հիմնված երկխոսություն է վարում, որոնց հետ դաշնակցային հարաբերություններ ունի, բնականաբար, Մոսկվան բարձրացնում և քննարկում է այդ հարցը։
«Մենք դա նրանց ուշադրությանն ենք ներկայացնում, ստանում ենք բացատրություններ, հերքումներ կամ աշխատում ենք նրա վրա, որ այդ վնասը, և այս վնասը միայն մեզ չի վերաբերում, դա վնաս է տարածաշրջանային և միջազգային խաղաղությանն ու կայունությանը, նվազագույնի հասցվի», – ասել է Զախարովան։
ՌԴ ԱԳՆ պաշտոնական ներկայացուցիչը անդրադարձել է նաև Բաքվում կալանավորված ռուս լրագրողների հարցին։
«Մենք կապ ենք պահպանում ադրբեջանական կողմի հետ այս հարցի շուրջ, այդ թվում՝ իրավապահ մարմինների միջոցով։ Եվ մենք համոզված ենք, որ բոլոր առաջացող հարցերը պետք է լուծվեն գործընկերային եղանակով՝ օգտագործելով առկա քաղաքական և դիվանագիտական ուղիները։ Հենց այս մոտեցումն է և իրականում ծառայում է մեր երկրների ժողովուրդների հիմնարար շահերին», – ասել է նա։
Հիշեցնենք, որ Բաքվի դատարանը օրերս կալանքի տակ էր թողել «Sputnik Ադրբեջան»-ի աշխատակիցներին։
Թարգմանությունը՝ Էմմա Չոբանյանի
