05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Թրամփը պաշտոնից ազատել է Մայք Ուոլցին․ նա կնշանակվի ՄԱԿ-ում ԱՄՆ դեսպան
Քաղաքականություն
02.05.2025 | 10:19
ԱՄՆ նախագահ Դոնալդ Թրամփը հաստատել է լրատվամիջոցներում տարածվող տեղեկություններն այն մասին, որ պաշտոնից ազատել է ազգային անվտանգության հարցերով իր խորհրդական Մայք Ուոլցին։ Այս մասին Թրամփը հայտնել է Truth Social սոցցանցում՝ նշելով, որ Ուոլցը կնշանակվի ՄԱԿ-ում ԱՄՆ դեսպան։
«Ուրախ եմ հայտարարել, որ Մայք Ուոլցին առաջադրում եմ որպես Միացյալ Նահանգների հաջորդ դեսպան ՄԱԿ-ում։ Մարտադաշտում համազգեստով ծառայելու, Կոնգրեսում և իմ ազգային անվտանգության խորհրդականի պաշտոնում ծառայելու օրերից սկսած՝ Մայք Ուոլցը քրտնաջան աշխատել է մեր երկրի շահերն առաջնային տեղում դնելու համար։ Գիտեմ, որ նա նույնը կանի նոր դերում։ Մինչ այդ, պետքարտուղար Մարկո Ռուբիոն կծառայի որպես ազգային անվտանգության խորհրդականի ժամանակավոր պաշտոնակատար՝ շարունակելով իր ուժեղ ղեկավարությունը Պետքարտուղարությունում»,- գրել է Թրամփը։
Ուոլցն իր հերթին X-ում գրել է, որ իր համար պատիվ է եղել Թրամփի խորհրդականը լինելը։
«Ես մեծ պատիվ եմ համարում, որ նախագահ Թրամփը վստահել է ինձ՝ իր կաբինետում որպես ազգային անվտանգության խորհրդական ծառայելու համար։ Չկա ավելի բարձր կոչում, քան պաշտպանել մեր ազգի արժեքները, ազատությունները և յուրաքանչյուր ամերիկացու անվտանգությունը։ Նախագահ Թրամփի և նրա թիմի հետ միասին մենք կդիմակայենք այսօրվա աշխարհի փոփոխվող մարտահրավերներին և կպայքարենք նրանց դեմ, որոնք կարող են վնասել մեր կենսակերպին: Մեր ազգն արժանի է միայն համարձակ, անսասան առաջնորդության, և դա է, ինչ նա կիրականացնի»,- նշել է Ուոլցը՝ հավելելով, որ «Ամերիկան իր դաշնակիցներին մոտ կպահի, չի վախենա հակառակորդներին դիմակայելուց և կներդնի այն տեխնոլոգիաներում, որոնք երկիրն ուժեղ կպահեն»։
Հավելենք, որ ավելի վաղ մի շարք լրատվամիջոցներ, վկայակոչելով աղբյուրներին, տեղեկություններ էին տարածել, որ Մայք Ուոլցը և նրա տեղակալ Ալեքս Վոնգը լքում են պաշտոնները։
Մարտին Ուոլցը հայտնվել էր քննադատությունների կենտրոնում, երբ Signal-ի չափում սխալմամբ ներառել էր The Atlantic-ի լրագրող Ջեֆրի Գոլդբերգին՝ բացահայտելով ազգային անվտանգության բարձրաստիճան պաշտոնյաների հետ քննարկումները Եմենում հութիների թիրախներին ռազմական հարված հասցնելու ծրագրերի վերաբերյալ։
Թարգմանությունը՝ Էմմա Չոբանյանի
