12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Coffee House-ը 450 մլն դրամի հա՞րկ է թաքցրել. սեփականատերը մեկնաբանում է իրավիճակը. ՏԵՍԱՆՅՈՒԹ
Հասարակություն
28.04.2025 | 20:30
Ավելի քան 5 մլն բաժակ սուրճ վաճառելու մասին հպարտությամբ հայտարարող «Coffeehouse» ընկերությունը, ըստ Քննչական կոմիտեի, հարկային պարտավորությունները չի կատարել։ Մինչ պաշտոնական տեղեկություններ հայտնի կդառնային, Երևանում և Հայաստանի այլ քաղաքներում մի քանի տասնյակի հասնող մասնաճյուղերը փակվել էին և կնքվել։ Ավելի ուշ իրավապահ մարմինը հայտարարեց՝ սուրճի վաճառքով զբաղվող հայտնի ընկերությանը վերագրվում է 450 միլիոն դրամի չկատարված հարկային պարտավորություն։ Այս գումարը համարժեք է ավելի քան 1 մլն 150 հազար դոլարի։
Այս գործի շրջանակում մի քանի օր դադարեցվել էր ընկերության գործունեությունը։ Վերաբացումից հետո մասնաճյուղերի աշխատակիցները հակված չեն խոսել ընկերության շուրջ քրեական աղմուկից։ Վաճառքի կետերից մեկում, առանց պատճառների մասին խոսելու, նշեցին միայն, որ ընկերությունը վերսկսել է աշխատանքը մինչ այս գործող ծավալով։
Factor TV-ին հայտնի դարձավ, որ գործի շրջանակում մեղադրանք է առաջադրվել «Coffeehouse» ընկերության սեփականատերեր Նարեկ Քեյանին ու Հարություն Մկրտչյանին։ Առաջադրված հոդվածը ենթադրում է խոշոր չափի հարկերի չվճարում, ինչը պատժվում է մինչև ութ տարի ժամկետով ազատազրկմամբ։
«Coffeehouse» ընկերության տնօրեն և 50 տոկոս բաժնեմասի սեփականատեր Հարություն Մկրտչյանը Factor TV-ի հետ զրույցում հարկային պարտավորությունները չկատարելու հանգամանքն ուղիղ չհաստատեց։ Միաժամանակ, սակայն, նշեց, որ պետբյուջե 125 մլն դրամ են վճարել։
Հարություն Մկրտչյանը հակված չէր խոսել այն մասին, թե ինչու են պետությունից գումար թաքցրել, պարբերաբար փորձում էր ուշադրությունը հրավիրել այն հանգամանքի վրա, որ բյուջե գումար են մուտքագրել։ Երբ հետաքրքրվեցինք՝ ինչո՞ւ են վճարումը կատարել, եթե կարծում է, թե պետությունից եկամուտները չեն թաքցրել, Մկրտչյանն ասաց՝ ընդունում է, որ թերացումներ կարող էին լինել։
Հարություն Մկրտչյանից զատ՝ ընկերությունում 50 տոկոս բաժնեմաս ունի Նարեկ Քեյանը։ Նրանք ընկերներ են։ Այս անձանց է պատկանում նաև 2024-ին հիմնադրված «Կոֆե Հաուս Պրայմ» ընկերությունը։ Հարկային պարտավորությունների չկատարման հետ կապված այս պատմությունից բացի՝ «Coffeehouse»-ն ապրիլին նաև արգելանքի տակ էր հայտնվել։ Իրավաբանական անձանց պետական ռեգիստրից Factor TV-ն տեղեկանում է, որ ԴԱՀԿ-ն ապրիլի 14-ին որոշել է Հարություն Մկրտչյանից հօգուտ Երևանի քաղաքապետարանի բռնագանձել 200 հազար դրամ, ինչը կատարվել է ապրիլի 22-ին։
«Coffeehouse»-ից զատ՝ Հարություն Մկրտչյանի և Նարեկ Քեյանի անունները հանդիպում են նաև այլ ընկերություններում մասնակցություններում։ Իրավաբանական անձանց պետական ռեգիստրից ստացված տեղեկության համաձայն՝ Նարեկն ու Հարությունը չորսական տոկոս բաժնեմաս ունեն բնակարանների կառուցապատմամբ զբաղվող «Դիլի Տրոպիկ» ընկերությունում։ Այս ընկերության բաժնետերերից Հակոբ Կիրեղյանը Երևանի քաղաքապետի ընտրությունների ժամանակ Տիգրան Ավինյանի քարոզարշավի կազմակերպման համար ՔՊ-ին 2,2 մլն դրամ էր նվիրաբերել։ Միաժամանակ, 2023 թվականին հիմնադրված «Բակեր» ՍՊԸ-ում ընկերներից յուրաքանչյուրին է պատկանում 25 տոկոս բաժնեմասը։ 2024-ին հիմնադրված մեկ այլ՝ «Ֆրենդ ընդ քո» ընկերությունում էլ նրանց է պատկանում 4,6 տոկոսը։
Մանրամասները՝ տեսանյութում։
Նարեկ Կիրակոսյան
