Բաքվում ԵՄ դիտորդներին մեղադրել են «լրտեսական ցանց ստեղծելու մեջ»

Հայաստանում ԵՄ առաքելության գործունեության մեկնարկից ի վեր Ադրբեջանի հետ սահմանի հայկական կողմում բազմաթիվ ռազմական օբյեկտներ են կառուցվել։ Նման պնդմամբ է հանդես եկել Ադրբեջանի Միլլի Մեջլիսի Արտաքին միջամտությունների և հիբրիդային սպառնալիքների դեմ պայքարի ժամանակավոր հանձնաժողովի նախագահ Ռամիդ Նամազովը Մեջլիսում հանրային լսումների ժամանակ։

Նա նշել է, որ, իբր, այդ փաստերը հավաքվել են դիտարկումների հիման վրա։

«Պատերազմից հետո օտարերկրյա միջամտությունների և հիբրիդային սպառնալիքների դեմ ժամանակավոր միջոցառումների հանձնաժողովը վերլուծություն է անցկացրել՝ օգտագործելով Ադրբեջանի և Հայաստանի պայմանական սահմանին, ինչպես նաև Հայաստանի և Իրանի սահմանին տեղի ունեցած իրադարձությունների արբանյակային պատկերները, որոնք ընդգրկում են ԵՄ առաքելության ժամանումից առաջ և հետո ընկած ժամանակահատվածները։ 2020-2022 թվականներին Հայաստանը սահմանին կառուցել է մոտ 20 ռազմական օբյեկտ։ 2022 թվականից ի վեր՝ Հայաստան ԵՄ առաքելության ժամանումից հետո, սահմանամերձ գոտիներում կառուցվել է շուրջ 70  ռազմական օբյեկտ։ Դրանց մեծ մասը գտնվում է Սյունիքում, Տավուշում, Արարատում, Վայոց ձորում, Գեղարքունիքում»,- հայտարարել է Նամազովը։

Ըստ նրա՝ ԵՄ դիտորդների ժամանումից հետո Հայաստանում նաև ստեղծվել են խրամատներ, ապաստարաններ։ Բաքվի թեզերին համահունչ՝ Նամազովը հայտարարել է նաև, որ «Եվրամիության առաքելությունը ձգտում է Հայաստանում ստեղծել լրտեսական ցանց՝ տարածաշրջանում իր ազդեցությունն ամրապնդելու համար»։

«Առաքելության անդամները հանդիպումներ են անցկացնում երիտասարդների հետ հայկական դպրոցներում և հետախուզական գործողություններ իրականացնում Ադրբեջանի հետ սահմանի երկայնքով։ Միևնույն ժամանակ, իրենց հայտարարություններում նրանք պնդում են, թե իրենք անզեն, քաղաքացիական առաքելություն են և որևէ գործողություն չեն ձեռնարկում Ադրբեջանի դեմ»,- ասել է պատգամավորը։

Հիշեցնենք, որ պաշտոնական Բաքուն Հայաստանում ԵՄ դիտորդներին մեղադրում է, իբր, «լրտեսական գործունեության մեջ», հետևում ՀՀ-ում դիտորդների տեղաշարժին և պարբերաբար տեսանյութեր հրապարակում։

Թարգմանությունը՝ Էմմա Չոբանյանի