ԵՏՄ-ից դուրս գալը ցավոտ կլինի ՀՀ-ի բնակչության համար․ Գալուզինը հայտարարել է՝ Մոսկվան Երևանի շահերը ճնշելու ծրագիր չունի

ԵՏՄ-ից դուրս գալու գործընթացը ցավոտ կլինի Հայաստանի բնակչության համար։ «Իզվեստիա»-ին տված հարցազրույցում այս մասին հայտարարել  ՌԴ ԱԳ փոխնախարար Միխայիլ Գալուզինը։

«Եթե Հայաստանը գնա եվրոպական ընտրության ճանապարհով, դա օբյեկտիվորեն կհանգեցնի այն տնտեսական հարաբերությունների վերանայմանը, որոնք Երևանն այսօր ունի ԵՏՄ-ի գծով իր գործընկերների հետ։ Դա, հավանաբար, բավականին ցավոտ գործընթաց կլինի, այդ թվում, ցավոք, Հայաստանի բնակչության համար։ Տրամաբանական է ենթադրել, որ երկրի ղեկավարությունը կբացատրի իր բնակչությանը, թե ինչ կարող է կորցնել ԵՏՄ-ից դուրս գալով և ինչ կարող է իրականում ստանալ Եվրամիությանն անդամակցությունից»,- հայտարարել է ՌԴ ԱԳ փոխնախարարը։

Նա նշել է, թե խոսքն այն մասին չէ, որ «Ռուսաստանը կամ որևէ մեկը ցանկանում է Հայաստանը բացառել կամ վնաս հասցնել շատ զարգացած տնտեսական համագործակցության համատեքստում, քանի որ ապրանքաշրջանառությունն անցյալ տարի կազմել է 12 մլրդ դոլար»։

«Մենք Հայաստանի շահերը ճնշելու ծրագիր չունենք և չի էլ կարող լինել։ Նա մեր դաշնակիցն է, ռազմավարական գործընկերը, որի հետ մեզ կապում է, ինչպես Վրաստանի հետ, դարավոր ընդհանուր պատմությունը, Հայրենական մեծ պատերազմում տարած ընդհանուր հաղթանակը, որի 80-ամյակը մենք, հուսով եմ, միասին կնշենք մայիսի 9-ին»,- ասել է նա։

Գալուզինը հավելել է՝ օբյեկտիվորեն ԵՄ-ին և ԵՏՄ-ին միաժամանակյա անդամակցությունն անհնար է, քանի որ այդ միություններն ունեն տարբեր մաքսային և սակագնային կարգավորումներ, դրանք էապես տարբեր տնտեսական բլոկներ են։

«Համապատասխանաբար, մեր հայ գործընկերները, հավանաբար, որոշ պահի ստիպված կլինեն որոշել, թե որ ուղղությամբ են շարժվում՝ դեպի Եվրամիությանը ինտեգրո՞ւմ, թե՞ Եվրասիական ինտեգրմանը շարունակական մասնակցություն։ Այդ մասնակցությունն ակնհայտ օգուտներ է բերում Հայաստանի բնակչությանը։ Եվ սա արտահայտվում է, առաջին հերթին, Հայաստանի ՀՆԱ-ի աճի շատ նշանակալի թվերով։ Վերջին մեկ տարվա ընթացքում այն ​​կազմել է մոտ 6%։ Մյուս կողմից, ի՞նչ է Եվրամիությունն այս փուլում Հայաստանի և մյուս երկրների համար։ Դա պահանջների և չափանիշների մի ամբողջություն է՝ մուտքի անորոշ հեռանկարներով»,- ասել է Գալուզինը։

Ռուսաստանցի պաշտոնյան նաև նշել է՝ «ԵՄ-ն բացահայտ թշնամական քաղաքականություն է վարում Ռուսաստանի՝ Հայաստանի հիմնական տնտեսական գործընկերոջ և ռազմավարական դաշնակցի նկատմամբ», և հույս հայտնել, որ պաշտոնական Երևանը տեսնում է այդ իրավիճակը և համապատասխան կերպով գնահատում։

«Հայաստանը դեռևս սդուրս չի գալիս Եվրասիական տնտեսական միության որևէ կառույցից։ Մենք բարձր ենք գնահատում նրա հաջող նախագահությունը ԵՏՄ-ում անցյալ տարի՝ 2024 թվականին, ուստի մեր համագործակցությունը շարունակվում է։ Երկրի ներկայացուցիչները նաև ակտիվորեն մասնակցում են ԱՊՀ մարմինների բոլոր միջոցառումներին և բոլոր փորձագիտական ​​​​հանդիպումներին»,- հայտարարել է Գալուզինը։

Թարգմանությունը՝ Էմմա Չոբանյանի