Սիրիա սնունդ և այլ պարագաներ են ուղարկվել․ ԱԳՆ-ն չի պարզաբանում՝ հումանիտար օգնության համար պետբյուջեից որքան գումար է հատկացվել

Հայաստանի Հանրապետության ԱԳ նախարարի տեղակալ Վահան Կոստանյանի և Սիրիայի Արաբարական Հանրապետության արտաքին գործերի և սփյուռքի նախարար Ասաադ Հասան Ալ- Շայբանիի հունվարի 27-ին կայացած հանդիպման ժամանակ ձեռք բերված պայմանավորվածության հիման վրա է մարտի 21-ին Հայաստանի կողմից «Մարգարայի» անցակետով մարդասիրական օգնություն ուղարկվել Սիրիա։ Այս մասին Factor.am-ի գրավոր հարցմանն ի պատասխան տեղեկացրել են Արտաքին գործերի նախարարությունից։

«Մարգարայի անցակետը հիշյալ նպատակով բացվել է Թուրքիայի հետ երկկողմ պայմանավորվածության արդյունքում»,- նշել են նախարարությունից։

ԱԳՆ-ից մանրամասնել են, որ Սիրիային ուղարկված 80 տոննա մարդասիրական բեռը ներառում է սնունդ և պարագաներ, բայց այդպես էլ չեն հայտնել, թե հումանիտար բեռի համար որքան գումար է պետբյուջեից հատկացվել։ Արտաքին գերատեսչությունից արձագանքել են, որ այդ հարցերն իրենց իրավասության շրջանակից դուրս են։

Նշենք, որ կառավարության մարտի 20-ի նիստում չզեկուցվող հարցով որոշվել է 10 օրով՝ մարտի 21-ից 31-ը Թուրքիայի հետ սահմանի «Մարգարա» անցակետը բացել , որպեսզի այդ երկրի տարածքով հումանիտար բեռներ ուղարկվեն Սիրիա։

Գործադիրի որոշման մեջ ասվում էր, որ որոշման նախագծի ընդունումը պայմանավորված է Հայաստանի Հանրապետության անունից Սիրիայի Արաբական Հանրապետություն ուղարկվելիք մարդասիրական օգնության համար նախատեսված բեռները Թուրքիայի տարածքով, ցամաքային ճանապարհով տեղափոխելու անհրաժեշտությամբ։

Հիշեցնենք, որ «Մարգարա» անցակետը բացվել էր նաև 2023 թվականին` Թուրքիայում տեղի ունեցած երկրաշարժից հետո։ Այդ ժամանակ Հայաստանը փետրվարի 8-ին 27 փրկարար էր ուղարկել Թուրքիայի աղետի գոտի, իսկ փետրվարի 11-ին և 15-ին` մարդասիրական օգնություն։

2022 թվականին հայ և թուրք բանագնացները համաձայնություն էին ձեռք բերել երրորդ երկրների քաղաքացիների և դիվանագիտական անձնագրեր ունեցող անձանց համար սահմանը բացելու մասով, սակայն այդ պայմանավորվածությունը մինչ օրս չի իրականացվել թուրքական կողմի դիրքորոշման պատճառով։

Հավելենք, որ Հայաստանը նորոգել է Մարգարայի անցակետը, իսկ փետրվարի 25–ից Հայաստան-Թուրքիա պետական սահմանի այդ անցման կետում սահմանային ծառայությունն իրականացվում է բացառապես ՀՀ սահմանապահ զորքերի ուժերով։

Մանյա Պողոսյան