25.05.2026 | 19:19
Անցկացվել է «Փայտփորիկ» սոլֆեջոյի երկրորդ հանրապետական օլիմպիադայի առաջին փուլը
ՌԴ-ն սկսել է վախենալ Ուկրաինայի հարցով Թրամփի «նվերներում» ծուղակների հնարավորությունից․ Bloomberg
Քաղաքականություն
21.02.2025 | 13:55
Դոնալդ Թրամփի՝ Սպիտակ տուն ժամանելուց հետո Ուկրաինայի նկատմամբ ԱՄՆ քաղաքականության արմատական շրջադարձն անակնկալ է եղել Կրեմլի համար, գրում է Bloomberg-ը՝ վկայակոչելով իրավիճակին ծանոթ աղբյուրների։
Գործակալության աղբյուրների համաձայն՝ Ռուսաստանի բարձրագույն ղեկավարությունը վախենում է ամերիկյան վարչակազմի հնարավոր «ծուղակներից» կամ անսպասելի շրջադարձերից, որը մինչ այժմ ցույց է տվել զիջումների գնալու պատրաստակամություն, որոնց մասին Կրեմլը երբեք չէր էլ երազել։ Ռուս պաշտոնյաները լիովին չեն հասկանում Թրամփի բանակցային մարտավարությունը, նշում են Bloomberg-ի աղբյուրները, իսկ նրա քննադատությունն Ուկրաինայի նախագահ Վլադիմիր Զելենսկիի հասցեին գերազանցել է սպասելիքները։
Խոստանալով ավարտել պատերազմը 24 ժամում՝ Թրամփը հեռախոսազրույց է ունեցել Վլադիմիր Պուտինի հետ իր երդմնակալությունից երեք շաբաթ անց, իսկ մեկ շաբաթ անց ռուսական և ամերիկյան պատվիրակությունները հանդիպել են Սաուդյան Արաբիայում՝ առանց Ուկրաինայի մասնակցության։ Բանակցություններից հետո որոշվել է վերականգնել դեսպանատների աշխատանքը, սկսվել են խորհրդակցություններ փոխադարձ «գրգռիչների» վերաբերյալ, իսկ ԱՄՆ ֆինանսների նախարար Սքոթ Բեսենթը հայտարարել է պատժամիջոցները թուլացնելու հնարավորության մասին՝ կախված Մոսկվայի դիրքորոշումից։
Մինչ այդ, ինքը՝ Թրամփը, սկսել է գրեթե բառացիորեն կրկնել կրեմլյան քարոզչամեքենայի նարատիվները։ Նա մեղադրել է Զելենսկիին այն բանում, որ հենց ինքն է հրահրել պատերազմը, նրան անվանել է «առանց ընտրությունների բռնապետ», որի վարկանիշը 4% է, ինչը 14 անգամ ավելի քիչ է, քան Կիևի սոցիոլոգիայի ինստիտուտի տվյալները (փետրվար ամսվա դրությամբ՝ 57%)։
Ամերիկացի դիվանագետները դեմ են եղել G7-ի հռչակագրում Ռուսաստանին «ագրեսոր» անվանելուն և չեն աջակցել ՄԱԿ-ի բանաձևին, որը պատերազմի երրորդ տարելիցին ընդառաջ՝ դատապարտում է ռուսական ներխուժումը:
Մինչ այդ, ԱՄՆ փոխնախագահ Ջեյ Դի Վենսը Մյունխենի անվտանգության համաժողովում ցնցել է ԵՄ առաջնորդներին՝ հայտարարելով, որ վերջիններս շեղվել են ժողովրդավարության սկզբունքներից և պետք է ինքնուրույն հոգան իրենց անվտանգության մասին։
«Մենք ստացանք դաշինք Ռուսաստանի նախագահի միջև, որն ուզում է ոչնչացնել Եվրոպան, և նախագահի միջև, որը նույնպես ցանկանում է ոչնչացնել Եվրոպան»,- Politico-ին ասել է մյունխենյան համաժողովին ներկա եվրոպացի դիվանագետը։
Եվ չնայած Մոսկվան զարմացած է Թրամփի պահվածքից՝ Կրեմլն ակնկալում է առավելագույն օգուտ քաղել հակամարտությանը վերջ տալու ցանկացած գործարքից, ասել է Bloomberg-ի աղբյուրը։
Ըստ The Moscow Times-ի՝ Ռուսաստանը կցանկանար, որ պատժամիջոցները մեղմացվեն և ապասառեցվեն ԱՄՆ-ում սառեցված ռուսական 6 միլիարդ դոլարի ակտիվները։ Պուտինը նաև ցանկանում է ապահովել Ուկրաինայի չեզոք կարգավիճակը, իշխանափոխությունը Կիևում, ուկրաինական բանակի կրճատումը և Ղրիմի և չորս օկուպացված շրջանների բռնակցման ճանաչումը:
Թարգմանությունը՝ Տաթև Ֆռանգյանի
