12.01.2026 | 01:05
«Բարսելոնան» հաղթեց «Ռեալին» ու դարձավ Իսպանիայի սուպերգավաթակիր․ ՏԵՍԱՆՅՈՒԹ
Կանաչ ու նարնջագույն դարակաշարեր․ ինչի համար են դրանք, և արդյոք առևտրի կետերը հետևում են նոր կանոնին
28.04.2025 | 16:10
Երեկվանից ուժի մեջ է մտել «Առևտրի և ծառայությունների մասին» օրենքում կատարված փոփոխությունը, որը սահմանում է կաթնամթերքի վաճառքի նոր կարգ։ Նոր կարգավորման համաձայն՝ փոխարինիչներով կաթնամթերքը և առանց դրանց` մաքուր կաթնամթերքը պետք է վաճառվեն տարբեր գույնի դարակներում։
Ապրիլի 27-ից առևտրի կետերում կանաչ դարակաշարերում, ըստ նոր կարգավորման, պետք է տեղադրվի այն կաթնամթերքը, որն առանց կաթնային յուղի փոխարինիչի է, իսկ նարնջագույն դարակաշարերում՝ կաթնային յուղի փոխարինիչ պարունակող կաթնամթերքը։
Ըստ սահմանված կարգի՝ դարակաշարերի վրա նշումները պարտադիր պետք է լինեն նաև «Առանց կաթնային յուղի փոխարինիչի» և «Պարունակում է կաթնային յուղի փոխարինիչ» անվանումով տեղեկատվական պիտակները։
Factor.am-ն այսօր շրջել է մայրաքաղաքում գործող սուպերմարկետների ցանցերի մի քանի առևտրի կետերում՝ պարզելու՝ արդյոք նոր կարգի կիրառմամբ է վաճառվում կաթնամթերքը, թե՝ ոչ։
Մենք արձանագրել ենք, որ, օրինակ, Սարյան12 հասցեում գործող առևտրի կետում կաթնամթերքը կանաչ և նարնջագույն դարակաշարերում տեղադրված չէ։
Սուպերմարկետներից մեկի՝ Մաշտոցի 42 հասցեում գտնվող առևտրի կետում ևս կաթնամթերքն այս պահին չի վաճառվում նոր կարգով, կանաչ և նարնջագույն դարակաշարերը դարձյալ բացակայում են։
Մեր շրջայցի ընթացքում արձանագրեցինք, որ սուպերմարկետներիցվ մեկի՝ Թումանյան փողոցում գտնվող առևտրի կետում կաթնամթերքը կանաչ և նարնջագույն դարակաշարերում են շարված, ինչպես նաև տեղադրված են տեղեկատվական պիտակները։
Թեև արդեն երկրորդ օրն է` ինչ կարգավորումն ուժի մեջ է, բայց սուպերմարկետներից մեկ ուրիշի՝ Մաշտոցի 20 հասցեում գտնվող մասնաճյուղի կաթնամթերքի վաճառքի բաժնում ևս առանձնացված չեն դարակաշարերը, չկան նաև տեղեկատվական պիտակները։
Սննդամթերքի անվտանգության և տեսչական մարմնի իրազեկման, խորհրդատվության և հանրության հետ տարվող աշխատանքների բաժնից հայտնեցին, որ սովորաբար նախատեսված պլանային ստուգումների ժամանակ են ուշադրություն դարձնում, որքանով են պահպանվում կաթնամթերքի վաճառքի համար սահմանված կանոնները։ ՍԱՏՄ-ից նշեցին, որ եթե սպառողների կողմից բողոք է լինում, գնում են բոլոր ահազանգերի հետքերով։
Նշենք, որ ըստ օրենքի, կաթնամթերքի վերաբերյալ նոր կարգավորումը պետք է գործի երկու հարյուր քառակուսի մետրից ավելի մակերես ունեցող առևտրի օբյեկտներում:
Իսկ տնտեսվարողները, որոնք չեն ապահովի կաթնամթերքի վաճառքի նոր կանոնները՝ վարչական տույժի կենթարկվեն։
Կարգավորման համաձայն՝ երկու հարյուր քառակուսի մետրից ավելի մակերես ունեցող առևտրի օբյեկտներում և իրացման ցանցերում կաթնամթերքի համապատասխան դարակաշարերում չտեղադրելը և «Պարունակում է կաթնային յուղի փոխարինիչ» ընթեռնելի և տեղադրված տեսանելի վայրում հատուկ տեսակի նշումով չապահովելը առաջացնում է նախազգուշացում:
Նույն խախտումը մեկ տարվա ընթացքում նախազգուշացումից հետո կրկին կատարելը կամ խախտումը վերացնելու մասին տրված հանձնարարականի կամ կարգադրագրի պահանջը սահմանված ժամկետում չկատարելն առաջացնում է տուգանքի նշանակում պաշտոնատար անձանց նկատմամբ՝ սահմանված նվազագույն աշխատավարձի երեսնապատիկի չափով՝ խախտման յուրաքանչյուր դեպքի համար:
Մանյա Պողոսյան
