Քաղաքականություն
18.02.2025 | 13:42
Թուրքիան առաջարկել է հյուրընկալել Ռուսաստանի և Ուկրաինայի միջև բանակցությունները՝ օգնելու վերջ դնել գրեթե երեք տարի տևող հակամարտությանը, մինչ աճում են մտահոգությունները ԱՄՆ-ի գլխավորած դիվանագիտական ջանքերի հետ կապված եվրոպացի և ուկրաինացի պաշտոնյաների բացառման կապակցությամբ: Այս մասին գրում է Türkiye-ն՝ նշելով, որ այս ֆոնին Անկարան հանել է «Թուրքիայում պետք է բանակցային սեղան դնել» խաղաքարտը։
Թուրքիայի ԱԳ նախարար Հաքան Ֆիդանն ինտենսիվ դիվանագիտական շփումների մեջ է․ վերջին երկու ամսում նա չորս հեռախոսազրույց է ունեցել ՌԴ ԱԳ նախարար Սերգեյ Լավրովի հետ։ Բացի այդ, Ֆիդանը հանդիպել է ԱՄՆ նորանշանակ պետքարտուղար Մարկո Ռուբիոյի հետ Մյունխենի անվտանգության համաժողովի ժամանակ՝ քննարկելով Ռուսաստանի և Ուկրաինայի միջև խաղաղության հաստատման հնարավորությունը։
Դիվանագիտական աղբյուրների համաձայն՝ Թուրքիան իրեն որպես առանցքային միջնորդ է դիրքավորել թե՛ Ռուսաստանի, թե՛ Ուկրաինայի հետ ունեցած ամուր կապերի պատճառով։ Անկարան բազմիցս պատրաստակամություն է հայտնել նպաստել կրակի դադարեցման և հնարավոր խաղաղության բանակցություններին՝ Կիևի և Մոսկվայի միջև հակամարտությունը դադարեցնելու համար:
Մյունխենի անվտանգության համաժողովի ընթացքում Ֆիդանը նաև քննարկումներ է անցկացրել Ուկրաինայի և Ռուսաստանի հարցերով Թրամփի հատուկ ներկայացուցիչ Քիթ Քելլոգի հետ, Ուկրաինայի նախագահի գրասենյակի ղեկավար Անդրեյ Երմակի և Ուկրաինայի ՊՆ ղեկավար Ռուստեմ Ումերովի հետ:
Թուրքիան վերահաստատել է իր դիրքորոշումը, որ պետք է դերակատարություն ունենա ցանկացած խաղաղ գործընթացում՝ երկու կողմերի հետ սերտ հարաբերությունների պատճառով։ Անկարան առաջարկել է հյուրընկալել բանակցությունները՝ ընդգծելով, որ կարող է ավելի էական ներդրում ունենալ, քան գործընթացի մյուս դերակատարները:
Լրատվամիջոցը ընդգծում է, որ Ուկրաինայի նախագահ Վլադիմիր Զելենսկինայցով Թուրքիայում է և սպասվում է, որ այսօր կհանդիպի Թուրքիայի նախագահ Ռեջեփ Թայիփ Էրդողանի հետ։Քննարկումները, հավանաբար, կկենտրոնանան Թուրքիայի դերի վրա պոտենցիալ խաղաղության ջանքերում և տարածաշրջանային անվտանգության մեջ:
Թուրքիան ավելի վաղ նպաստել է Ռուսաստանի և Ուկրաինայի միջև խաղաղ բանակցություններին պատերազմի սկզբնական փուլում: Սակայն, նշվում է, թե իբրև կարգավորման հասնելու ջանքերը խափանվել են Արևմուտքի միջամտությամբ՝ թույլ չտալով վերջնական համաձայնության հասնել:
Թարգմանությունը՝ Էմմա Չոբանյանի
