30.04.2026 | 09:30
Սամվել Ալեքսանյանը 350 հազար կիլոգրամ գոմեշի միս է ներկրելու Հնդկաստանից․ Կառավարությունից աջակցություն է խնդրում
Թուրքիայի նավթային հսկան կրճատում է ռուսական նավթի գնումները ԱՄՆ պատժամիջոցների պատճառով․ Bloomberg
Քաղաքականություն
14.02.2025 | 17:09
Թուրքիայի խոշորագույն նավթավերամշակող Tüpraş ընկերությունը կրճատում է ռուսական հումքի և նավթամթերքի ներկրումը՝ ԱՄՆ պատժամիջոցներից խուսափելու համար։ Այս մասին հաղորդում է Bloomberg-ը, որին վկայակոչում է Turkish Minute-ը:
Այս քայլը տեղի է ունենում այն բանից հետո, երբ անցյալ ամիս Վաշինգտոնը լայնածավալ սահմանափակումներ է մտցրել Մոսկվայի էներգետիկ համակարգի վրա։
Փետրվարի 27-ից Türkiye Petrol Rafinerileri AŞ-ն (Tüpraş) այլևս չի ընդունի այն բեռնափոխադրումները, որոնք գերազանցում են G7 երկրների կողմից սահմանված գնային շեմը, Bloomberg-ին հայտնել է որոշմանը ծանոթ աղբյուրը։
Հունվարի 10-ին պատժամիջոցների հայտարարումից հետո ընկերությունն արդեն դադարեցրել է ռուսական նավթի գնումը սահմանաչափից բարձր գնով, սակայն կշարունակի ստանալ նախապես համաձայնեցված մատակարարումները մինչև վերջնաժամկետը։ Պատժամիջոցները գնորդներին ստիպել են ավելի զգուշանալ ռուսական նավթի հետ առևտրային գործարքներից, ներառյալ՝ խոշոր ներկրողներին, ինչպիսիք են Թուրքիան, Հնդկաստանը և Չինաստանը:
Tüpraş-ը, որն իր հումքի զգալի մասը ստանում էր Ռուսաստանից, Urals տեսակի նավթի խոշորագույն գնորդներից մեկն է եղել։ Bloomberg-ի կողմից հավաքագրված նավերի հետագծման տվյալները ցույց են տալիս, որ ընկերության գնումները կազմել են անցյալ տարվա Ռուսաստանի ծովային հումքի արտահանման մոտավորապես 5,5 տոկոսը:
Ռուսաստանը դարձել է Թուրքիայի նավթի խոշորագույն մատակարարը 2022 թվականին Ուկրաինա ներխուժելուց հետո՝ մատակարարելով երկրի հումքի և նավթամթերքի ներմուծման մոտ 65 տոկոսը։
Այնուամենայնիվ, նոր սահմանափակումները կարող են ստիպել Tüpraş-ին այլընտրանքային աղբյուրներ փնտրել G7-ի կողմից սահմանված գների սահմանաչափերին համապատասխանելու համար՝ 60 դոլար մեկ բարել հումքի համար, 100 դոլար՝ բարձրակարգ վառելիքի և 45 դոլար՝ զեղչված ապրանքների համար:
Լրատվամիջոցն ընդգծում է, որ դեռևս պարզ չէ՝ արդյո՞ք Tüpraş-ը կշարունակի գնել ռուսական նավթը սահմանաչափից ցածր գներով, թե կանցնի այլ մատակարարների: ՌԴ-ն ավելի վաղ հայտարարել էր, որ նավթ չի վաճառի այն գնորդներին, որոնք հավատարիմ են մնում Արևմուտքի կողմից սահմանված սահմանափակումներին։
Թարգմանությունը՝ Էմմա Չոբանյանի
