Մակրոնը հեռախոսազրույց է ունեցել Սիրիայի անցումային նախագահի հետ և նրան Ֆրանսիա հրավիրել

Ֆրանսիայի նախագահ Էմանուել Մակրոնը չորեքշաբթի հեռախոսազրույց է ունեցել Սիրիայի անցումային նախագահ Ահմեդ ալ-Շարաայի հետ և հրավիրել նրան առաջիկա շաբաթներին այցելել Ֆրանսիա: Սա Ալ-Շարաայի առաջին անմիջական շփումն է եվրոպական պետության ղեկավարի հետ, գրում է dpa գործակալությունը։

Սիրիայի նախագահականի հաղորդագրության համաձայն՝ Մակրոնը շնորհավորել է ալ-Շարաային նախագահի պաշտոնը ստանձնելու և «երկիրն ազատագրելու» կապակցությամբ։

Ի սկզբանե Փարիզից հրավերի պաշտոնական հաստատում չի եղել։ Ելիսեյան պալատից հայտնել են, որ Մակրոնը հեռախոսազրույցը նախաձեռնել է Սիրիայի հարցով միջազգային համաժողովի կապակցությամբ, որը պետք է տեղի ունենա Փարիզում փետրվարի 13-ին։ Մակրոնը հույս է հայտնել, որ ժամանակավոր կառավարության նախաձեռնած գործընթացը լիովին կբավարարի Սիրիայի ժողովրդի ձգտումները։ Մակրոնը նաև ընդգծել է Ֆրանսիայի հավատարմությունը Սիրիայում ժողովրդավարական ուժերին և կոչ է արել նրանց լիարժեք ինտեգրվել սիրիական անցումային գործընթացին։

Ֆրանսիական կողմի հաղորդագրության համաձայն՝ Ֆրանսիան աշխատում է Սիրիայի դեմ պատժամիջոցները չեղարկելու ուղղությամբ՝ տնտեսության վերականգնումն ու աճը խթանելու համար։

Ալ-Շարաան շնորհակալություն է հայտնել Մակրոնին՝ վերջին տարիներին Ֆրանսիայի կողմից սիրիացի ժողովրդին ցուցաբերած աջակցության համար։

Նշենք, որ Սիրիայում իշխանափոխությունից և պաշտոնը ստանձնելուց ի վեր Ալ-Շարաան այցեր է կատարել Սաուդյան Արաբիա և Թուրքիա։

Ֆրանսիան արագորեն հետամուտ է լինում Սիրիայի նոր վարչակազմի հետ մերձեցմանը։ Հունվարի սկզբին ԵՄ-ի անունից Դամասկոս էին այցելել Ֆրանսիայի արտգործնախարար Ժան-Նոել Բարրոն և նրա գերմանացի գործընկեր Անալենա Բերբոքը։

Մակրոնի հետ հեռախոսազանգից անմիջապես առաջ Սիրիայի ցամաքային և ծովային նավահանգիստների վարչությունը հայտարարել է, որ ֆրանսիական CMA CGM նավագնացության հսկան կշարունակի շահագործել Միջերկրական ծովում Լաթաքիայի կարևոր կոնտեյներային տերմինալը նոր պայմանագրով։ Համաձայնագիրը ներառում է «նոր պայմաններ և մեխանիզմներ», ինչպես նաև երկու կողմերի պարտքի կարգավորում։ Լաթաքիան Սիրիայի ամենակարևոր նավահանգիստն է։

Թարգմանությունը՝ Էմմա Չոբանյանի