02.07.2026 | 10:00
Արտարժույթների փոխարժեքները՝ հուլիսի 2-ի դրությամբ
Կուբան բանակցություններ է սկսել ԱՄՆ-ի հետ
Քաղաքականություն
13.03.2026 | 23:28
Կուբայի նախագահ Միգել Դիաս-Կանելը հայտարարել է, որ բանակցություններ են սկսել ԱՄՆ-ի իշխանությունների հետ՝ երկու երկրների միջև առկա տարաձայնությունների լուծման նպատակով։
Կուբայի նախագահի խոսքով՝ կուբացի պաշտոնյաները բանակցություններ են անցկացրել, «որպեսզի երկխոսության միջոցով գտնեն երկրների միջև առկա երկկողմ տարաձայնությունների հնարավոր լուծումներ»։ The Wall Street Journal-ի փոխանցմամբ՝ այս մասին նա հայտարարել է մամուլի ասուլիսի ժամանակ։
Նախագահի ելույթից մի քանի ժամ առաջ Կուբայի արտաքին գործերի նախարարությունը հայտնել էր, որ իշխանությունները պատրաստվում են ազատ արձակել 51 կալանավորի՝ Վատիկանի միջնորդությամբ, սակայն չի հստակեցվել՝ խոսքը շարքային, թե քաղբանտարկյալների մասին է։
Վերջին շաբաթներին ԱՄՆ նախագահ Դոնալդ Թրամփը հայտարարել էր, որ Կուբայի կառավարությունը «շուտով կփլուզվի»։
Ըստ The Wall Street Journal-ի՝ Թրամփի վարչակազմը փորձում էր գործակալներ հավաքագրել Կուբայի կառավարությունում՝ երկրում մինչև 2026 թվականի վերջ իշխանափոխություն իրականացնելու նպատակով։
Միաժամանակ Մարկո Ռուբիոն բանակցություններ էր վարում Ռաուլ Գիլյերմո Ռոդրիգես Կաստրոյի՝ Կուբայի նախկին նախագահ Ռաուլ Կաստրոյի թոռան հետ, հաղորդել էր Axios-ը։
Ավելի վաղ Թրամփի վարչակազմը արգելափակել էր Կուբա նավթի մատակարարումները, երբ ամերիկյան հատուկջոկատայինները հունվարի սկզբին գերեվարել էին Վենեսուելայի առաջնորդ Նիկոլաս Մադուրոյին։ Վաշինգտոնի այդ քայլերը խորացրել են էլեկտրաէներգիայի մատակարարման խափանումները և ավելի են թուլացրել Կուբայի տնտեսությունը։
