Թուրքերի ավելի քան մեկ երրորդը Թրամփի վերադարձը դրական է համարում Թուրքիայի համար

Թուրքերի ավելի քան մեկ երրորդը կարծում է, որ Դոնալդ Թրամփի վերադարձը Սպիտակ տուն դրական զարգացում է Թուրքիայի համար: Այս մասին վկայում է վերջին զեկույցը, որը հիմնված է բազմաթիվ երկրների սոցհարցումների վրա։ Այն հրապարակվել է Արտաքին հարաբերությունների եվրոպական խորհրդի (ECFR) կողմից՝ Օքսֆորդի համալսարանի «Եվրոպան փոփոխվող աշխարհում» նախագծի հետ համատեղ, փոխանցում է Turkish Minute-ը։

«Միայնակ Թրամփի աշխարհում. ԵՄ-ն և գլոբալ հասարակական կարծիքը ԱՄՆ ընտրություններից հետո» ուսումնասիրությունն իրականացվել է նոյեմբերին՝ ԱՄՆ նախագահական ընտրություններից անմիջապես հետո, 28,549 մարդկանց շրջանում՝ 24 երկրներում։

Հարցումը ցույց է տվել, որ աշխարհի շատ երկրներում մարդիկ լավատես են Թրամփի նախագահության երկրորդ ժամկետի հարցում՝ հավատալով, որ դա ոչ միայն օգուտ կբերի Ամերիկային, այլև կբերի խաղաղություն կամ կնվազեցնի լարվածությունը Ուկրաինայում, Մերձավոր Արևելքում և ԱՄՆ-Չինաստան հարաբերություններում, մինչդեռ եվրոպացիները գրեթե միայնակ են մտահոգվում Թրամփի ընտրության համար:

Զեկույցի համաձայն՝ Թուրքիան առաջատար միջին տերություններից է, որտեղ քաղաքացիները լավատեսորեն են տրամադրված Թրամփի վերադարձի հարցում։ Բացի Թուրքիայից՝ Հնդկաստանի, Չինաստանի և Բրազիլիայի նման երկրների բնակչության մեծամասնությունը կամ զգալի մասը նույնպես հավատում է, որ նրա վերադարձը ձեռնտու կլինի գլոբալ խաղաղության, սեփական երկրների և ամերիկացի քաղաքացիների համար:

Հարցին՝ Թրամփի ընտրությունն ԱՄՆ նախագահի պաշտոնում լա՞վ է, թե՞ վատ իրենց երկրի համար, թուրքերի 35 տոկոսը պատասխանել է, որ «լավ է», մինչդեռ 30 տոկոսը հակառակ տեսակետն է հայտնել։ Հարցվածների մնացած 35 տոկոսն ասել է, որ ոչ մի տարբերակ չի արտացոլում իրենց կարծիքը, կամ որ իրենք կարծիք չունեն այդ հարցի վերաբերյալ:

Մինչ թուրքերի 53 տոկոսը կարծում է, որ Թրամփի ընտրությունը «լավ» է Ամերիկայի քաղաքացիների համար, միայն 17 տոկոսն է կարծում, որ «վատ» է իրենց համար։ Համաշխարհային խաղաղության առումով Թուրքիայում հարցման մասնակիցների 38 տոկոսը նշել է, որ Թրամփի ընտրությունը ձեռնտու է, մինչդեռ 30 տոկոսը կարծում է, որ դա բացասական ազդեցություն կունենա։

Հետազոտության մեջ Թուրքիան նշվում է որպես միջին մակարդակի տերություն, որին շատ այլ երկրներ դիտարկում են հիմնականում որպես գործընկեր՝ նշելով, որ Թուրքիայի հետ ավելի արդյունավետ գործընկերության ձգտումը պետք է դառնա ԵՄ ամենահրատապ առաջնահերթություններից մեկը։

Ըստ զեկույցի՝ նման մերձեցումը կարող է «ուժեղացնել ԵՄ-ի ազդեցությունը մերձավորարևելյան նոր կարգի ձևավորման գործում, բարենպաստ ազդեցություն ունենալ Ռուսաստան-Ուկրաինա սպասվող բանակցությունների վրա և ուժեղացնել դաշինքի ազդեցությունն Աֆրիկայում»:

Թարգմանությունը՝ Էմմա Չոբանյանի