Բաքուն դատապարտել է Ադրբեջանում մարդու իրավիճակի վերաբերյալ ԱՄՆ պետքարտուղարի հայտարարությունը՝ այն երկրի «դատական և իրավական գործընթացին միջամտություն» որակելով

Բաքուն դատապարտել է Ադրբեջանում մարդու իրավունքների վիճակի մասին ԱՄՆ պետքարտուղար Էնթոնի Բլինքենի հայտարարությունը՝ նշելով, թե Բլինքենը «խեղաթյուրում է մարդու իրավունքների և ազատությունների հետ կապված ներկայիս իրավիճակը, ինչպես նաև միջամտում Ադրբեջանի դատական ​​և իրավական գործընթացին»։

«Մենք կտրականապես դատապարտում և մերժում ենք այս կողմնակալ հայտարարությունը»,- ասվում է  Ադրբեջանի ԱԳՆ մամուլի խոսնակ Այխան Հաջիզադեի հայտարարության մեջ։

Բաքուն Բլինքենին մեղադրում է երկրի ներքին գործերին խառնվելու մեջ։

«Ցավոք, վերջին 4 տարիների ընթացքում ԱՄՆ Պետքարտուղարության կողմից Ադրբեջանի ներքին գործերին միջամտության պատճառով դիտարկվող ժամանակահատվածը կորած է համարվում ադրբեջանա-ամերիկյան հարաբերությունների համար, որոնք շատ փուլերում  հայտի են եղել  բարեկամությամբ և համագործակցությամբ։ Բոլորը քաջատեղյակ են, որ Էնթոնի Բլինքենի՝ երկակի ստանդարտների դիրքորոշումը մեր երկրում մարդու իրավունքների ներկա իրավիճակի վերաբերյալ կաթվածահար է արել ԱՄՆ-ի քաղաքականությունն ամբողջությամբ Հարավային Կովկասում։ Հուսով ենք, որ ԱՄՆ նոր վարչակազմի օրոք Ադրբեջանի և ԱՄՆ-ի միջև բարեկամական և գործընկերային հարաբերությունները կվերականգնվեն»,- ասվում է ադրբեջանական կողմից հայտարարության մեջ։

Նշենք, որ նախօրեին ԱՄՆ պետքարտուղար Էնթոնի Բլինքենն Ադրբեջանում քաղաքացիական հասարակության և լրատվամիջոցների նկատմամբ բռնաճնշումների էսկալացիայի վերաբերյալ հայտարարություն էր տարածել։

Դրանում նշվում է, որ Միացյալ Նահանգները կոչ է անում Ադրբեջանի կառավարությանը անհապաղ ազատ արձակել Ռուֆաթ Սաֆարովին, Սևինջ Վագըֆքըզիին, Ազեր Գասիմլիին, Ֆարիդ Մեհրալիզադային, Բախտիյար Հաջիևին, Գուբադ Իբադողլուին, Meydan TV-ի վերջերս կալանավորված աշխատակիցներին և շատ ուրիշների, որոնք ձերբակալվել են մարդու իրավունքների ոլորտում իրենց աշխատանքի համար: Վաշինգտոնը խորապես մտահոգված է ոչ միայն այս ձերբակալություններով, այլև Ադրբեջանում քաղաքացիական հասարակության և ԶԼՄ-ների դեմ աճող ճնշումներով:

Նշվում է, որ այդ անձանցից երկուսն այս շաբաթ պարգևատրվելու էին Վաշինգտոնում իրենց իրավապաշտպան աշխատանքի համար։

«Մենք կոչ ենք անում Ադրբեջանի կառավարությանն ազատ արձակել անարդարացիորեն ձերբակալվածներին, դադարեցնել բռնաճնշումները քաղաքացիական հասարակության նկատմամբ, հարգել բոլորի մարդու իրավունքներն ու հիմնարար ազատությունները և կատարել այն պարտավորությունները, որոնք նա ստանձնել է Եվրոպայի անվտանգության և համագործակցության կազմակերպությանն անդամակցելիս»,- հայտարարում է Բլինքենը։

Թարգմանությունը՝ Էմմա Չոբանյանի