26.05.2026 | 13:27
Հարի Քեյնը կարժանանա «Ոսկե խաղակոշիկին»․ անգլիացու բոլոր գոլերը՝ մեկ տեսաշարով․ ՏԵՍԱՆՅՈՒԹ
Թուրքիան Մեծ Բրիտանիայից շահագործումից հանված Super Hercules ռազմատրանսպորտային ինքնաթիռներ կգնի
Քաղաքականություն
11.12.2024 | 23:30
Թուրքիան բանակցություններ է վարում Մեծ Բրիտանիայի թագավորական ռազմաօդային ուժերից (RAF) 12 օգտագործված C-130J Super Hercules ինքնաթիռներ ձեռք բերելու հարցով: Այս մասին հաղորդում է հոլանդական ավիացիոն ընկերակցության Scramble կայքը՝ նշելով, որ ակնկալվում է, որ դրանով կխթանվեն Անկարայի ռազմական տրանսպորտային կարողությունները, գրում է Turkish Minute-ը։
Այս տրանսպորտային ինքնաթիռները «թոշակի են անցել» 2022 թվականին։ Դրանք նախ առաջարկվել են Հունաստանին: Ըստ հունական Kathimerini-ի՝ Աթենքը մերժել է գործարքն այն բանից հետո, երբ տեխնիկական փորձագետները որոշել են, որ օդանավը կպահանջի լայնածավալ և ծախսատար հիմնանորոգումներ՝ տարիքի և տեխնիկական վիճակի պատճառով:
Ըստ լրատվամիջոցների՝ Անկարան համաձայնել է գնել 12 ինքնաթիռները 740 միլիոն դոլարով։ C-130J Super Hercules-ը, որն արտադրվել է Lockheed Martin-ի կողմից, շահագործման է հանձնվել 1999 թվականին և ներկայացնում է մեծ արդիականացման տարբերակ նախորդ մոդելների համեմատ՝ ուժեղացված ավիոնիկայով և կատարողական հնարավորություններով: Ինքնաթիռը, որը լայնորեն օգտագործվում է ամբողջ աշխարհում ռազմական տրանսպորտի համար, կարող է կատարել բազմաթիվ դերեր, այդ թվում՝ նյութատեխնիկական աջակցություն, օդային գործողություններ, մարդասիրական օգնություն և շտապ բժշկական տարհանում:
Բրիտանական C-130J-ները լայնածավալ ծառայություն են իրականացրել Իրաքում և Աֆղանստանում՝ կատարելով մարտական աջակցության առաքելություններ և բժշկական տարհանումներ։ Ակնկալվում է, որ C-130 Hercules-ի այս կատարելագործված տարբերակն առանցքային դեր կխաղա Թուրքիայի ռազմավարական օդային և պաշտպանական գործողություններում, մասնավորապես, ՆԱՏՕ-ի և դաշնակից ուժերի հետ համատեղ առաքելություններում:
Թուրքիան երկար ժամանակ շահագործում է C-130 հարթակը, և նրա օդուժն արդեն շահագործում է C-130B և C-130E մոդելները։ Այս ինքնաթիռները, որոնք տեղակայված են կենտրոնական Կայսերի նահանգում՝ 222-րդ տրանսպորտային ջոկատի կազմում, դարձել են Թուրքիայի մարտավարական և ռազմավարական օդային փոխադրումների ողնաշարը։
Թուրքիան ներկայում ներգրավված է ERCIYES-ի արդիականացման ծրագրում, որը զգալի ջանքեր է գործադրում արդիականացնելու 19 C-130, այդ թվում՝ 13 C-130E և 6 C-130B մոդելները Կայսերիում գտնվող օդային մատակարարումների սպասարկման կենտրոնում:
Ակնկալվում է, որ 12 օգտագործված C-130J տրանսպորտային ինքնաթիռները կաջակցեն Թուրքիայի ծերացած C-130 տրանսպորտային ինքնաթիռների նավատորմին և կթեթևացնեն ներկայումս գործող 10 A400M տրանսպորտային ինքնաթիռների գործառնական բեռը:
Ի հավելումն C-130 Hercules-ի շուրջ բանակցությունների՝ Թուրքիան և Մեծ Բրիտանիան ներգրավված են ավելի լայն պաշտպանական բանակցություններում, որոնք ներառում են քննարկումներ Eurofighter Typhoon ինքնաթիռների շուրջ: Այս քննարկումները մեծ թափ ստացան ինքնաթիռները Թուրքիային մատակարարելու հարցով Գերմանիայի հավանությունից հետո:
Քննարկումները դուրս են գալիս ավիացիայից: Թուրքիան առաջարկել է նաև վաճառել իր Hürjet ուսումնական ինքնաթիռը Բրիտանիայի Թագավորական ռազմաօդային ուժերին։ Hürjet-ը, որը վերջերս ստուգվել է Միացյալ Թագավորության պաշտպանության նախարարության կողմից, դիտարկվում է որպես թագավորական օդուժի հնացած BAE Systems Hawk T2 ինքնաթիռի փոխարինող:
Երկու երկրներն ուսումնասիրում են ցամաքային համակարգերում հնարավոր համագործակցությունը: Թուրքիան բրիտանական բանակին առաջարկել է Nurol Makina զրահամեքենաներ՝ Միացյալ Թագավորությունում տեղայնացված արտադրության հնարավորությամբ՝ երկկողմ պաշտպանական կապերն ամրապնդելու համար։
Թարգմանությունը՝ Էմմա Չոբանյանի
