Հարավային Կորեայի իշխող կուսակցությունը պահանջում է նախագահի հրաժարականը

Հարավային Կորեայի իշխող «Ժողովրդական ուժ» կուսակցության առաջնորդ Հան Դոնգ Հունը երկրի նախագահ Յուն Սոկ Յոլից պահանջել է հրաժարական տալ՝ ռազմական դրություն մտցնելու հետ կապված դեմարշի պատճառով։ Նա նաև ասել է, որ պետության ղեկավարը մեծ վտանգ է ներկայացնում երկրի համար, փոխանցում է DW-ի ռուսական ծառայությունը։

Ըստ AFP-ի՝ այս մեկնաբանությունը գրեթե երաշխավորում է, որ դեկտեմբերի 7-ին բավականաչափ օրենսդիրներ կքվեարկեն նախագահի իմփիչմենթի համար։

Դեռևս դեկտեմբերի 5-ին Հան Դոնգ Հունն ասել էր, որ կարգելափակի իմփիչմենթը։ Նրա դիրքորոշման փոփոխությունը պայմանավորված է այն հանգամանքով, որ պետության ղեկավարը չի ընդունում, որ սխալ է գործել:

«Հաշվի առնելով նոր փաստերը՝ ես կարծում եմ, որ նախագահ Յուն Սոկ Յոլի վաղաժամկետ հեռացումն անհրաժեշտ է Կորեայի Հանրապետությունը և նրա ժողովրդին պաշտպանելու համար»,- ասել է կուսակցության առաջնորդը։

Նա նշել է, որ նախագահը կադրային միջոցներ չի ձեռնարկել իրավիճակին «ապօրինի միջամտած» զինվորականների նկատմամբ։

«Ավելին, նա չի ընդունում, որ այս անօրինական ռազմական դրությունը սխալ է»,- ասել է Հան Դոնգ Հունը:

Իշխող կուսակցության ղեկավարը նշել է նաև, որ նախագահը ռազմական դրության ժամանակ հրամայել է հակահետախուզության ղեկավարին կալանքի տակ վերցնել մի շարք առանցքային քաղաքական գործիչների՝ «հակապետական գործունեության» մեղադրանքով։

«Հետևաբար, եթե նախագահ Յունը շարունակի ծառայել որպես պետության ղեկավար, կա ծայրահեղ գործողությունների կրկնման զգալի ռիսկ, որը նման է ներկայիս արտակարգ դրությանը, ինչը կարող է մեծ վտանգի ենթարկել Կորեայի Հանրապետությանը և նրա քաղաքացիներին»,- հավելել է նա:

Թարգմանությունը՝ Տաթև Ֆռանգյանի