Քաղաքականություն
05.12.2024 | 14:54
Հարավային Կորեայի նախագահ Յուն Սոկ Յոլի դեմ հետաքննություն է սկսվել ապստամբության կասկածանքով: Պատճառը ռազմական դրության սահմանումն է, հայտնում է AFP-ն։ Գործակալությունը պարզաբանում է, որ այս մեղադրանքը դուրս է գալիս նախագահական անձեռնմխելիությունից և կարող է հանգեցնել մահապատժի։ Yonhap-ը գրում է, որ հետաքննությունն անցկացվում է պետական դավաճանության հոդվածով։
Կորեայի Հանրապետության Ազգային քննչական գործակալության տնօրեն Վու Չժոն Սուն ասել է, որ իրավիճակն «աննախադեպ է»։
«Մենք ուշադիր կանցկացնենք հետաքննությունը՝ օրենքի և ընթացակարգի համաձայն»,- վստահեցրել է նա։
Վերջին մահապատիժը Հարավային Կորեայում տեղի է ունեցել 1997 թվականի դեկտեմբերին։ Այն ժամանակ դատավճիռը կայացվել է առնվազն երկու սպանության մեջ մեղադրվող 23 մարդու նկատմամբ։ 1998 թվականին երկրի այն ժամանակվա նախագահ Կիմ Դե-Յունգը մահապատժի մորատորիում է մտցրել, որը մինչ օրս գործում է, հանրապետությունում մահապատիժը գրեթե չեղյալ է հայտարարված։ Միաժամանակ, երկրում մահապատժի է սպասում 60 մարդ։
Հիշեցնենք, որ Յուն Սոկ Յոլը դեկտեմբերի 3-ին ռազմական դրություն էր հայտարարել երկրում։ Նա «հյուսիսկորեամետ» ընդդիմությանը մեղադրել է սահմանադրական կարգը խաթարելու փորձերի մեջ։ Սակայն խորհրդարանի անդամները դեմ են քվեարկել ռազմական դրությանը: Օրենքով դա պարտավորեցնում է նախագահին չեղարկել իր որոշումը, ինչն էլ նա արել է նույն օրը։
Դեկտեմբերի 6-7-ը խորհրդարանը կքվեարկի ընդդիմության ներկայացրած նախագահի իմփիչմենթի նախագծին։
Թարգմանությունը՝ Տաթև Ֆռանգյանի
