20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Ովքեր ավելի շատ հարկ կվճարեն․ օրենքի աղմկահարույց փոփոխության վտանգները․ ՏԵՍԱՆՅՈՒԹ
Քաղաքականություն
05.12.2024 | 19:00
«Այս քաղաքականության նպատակը հարկման հավասարության և արդարության սկզբունքների ամրապնդումն է»․ ահա այսպես է Կառավարությունը բացատրում հարկային բեռը մի քանի անգամ ավելացնելու աղմկահարույց նախագծի ընդունման անհրաժեշտությունը, որը, ընդունվելու դեպքում, հաջորդ տարվա հուլիսի 1-ից ուժի մեջ կմտնի։
Եթե այս նախագիծը դեռևս քննարկման փուլում է, ապա հավասար հարկման սկզբունքը հունվարի 1-ից արդեն կկիրառվի փաստաբանական և նոտարական ծառայությունների ոլորտում։ 5 տոկոս շրջանառության հարկից տեղափոխություն է լինելու ավելացված արժեքի հարկման դաշտ, ինչի հետևանքով փաստաբանական ծառայություններ մատուցողների համար ԱԱՀ-ն կազմելու է 20, իսկ շահութահարկը՝ 18 տոկոս։
Եթե նոտարների կողմից դժգոհություններ չէին բարձրաձայնվում, ապա փաստաբանների դեպքում պատկերը բոլորովին այլ էր. մեկօրյա գործադուլից մինչև դիմումի ներկայացում Մարդու իրավունքների պաշտպանին։ Նրանք հայտարարում էին՝ սա ոչ թե իրենց համար է խնդիր դառնալու, այլ քաղաքացիների։ Սա նշանակում է, որ փաստաբանների կամ իրավապաշտպանների կողմից իրականացվող անվճար իրավաբանական խորհրդատվությունները ևս պետք է հարկվեն, ինչը, նրանց դիտարկմամբ, անտրամաբանական է։
Ոչ միայն հակասահմանադրական չճանաչվեց, այլև անգամ ընթացք չտրվեց։ Մարդու իրավունքների պաշտպանն էր դիմել Սահմանադրական դատարան, որը, սակայն, որոշում էր կայացրել չքննել դիմումը՝ նշելով՝ ՄԻՊ-ը նման հարցով դատարան դիմելու իրավասություն չունի։ Այսպիսով, օրենքը չեղարկելու բոլոր դռները փաստացի փակվեցին։
Եթե փաստաբանների և նոտարների հարկերի ավելացման մասով հետդարձի ճանապարհ, կարծես, չկա, ապա իրավաբանական և հաշվապահական գործունեության, կառավարման հարցերով խորհրդատվության, շենքերի, քաղաքացիական շինարարության, անշարժ գույքի հետ գործառնություններ վարձատրության կամ պայմանագրային հիմունքով և տեխնիկական այլ գործունեության մասով նախագիծը դեռ ակտիվ քննարկման փուլում է։ Ֆինանսների նախարարությունը նշում է՝ նոր փոփոխությունն իր հետ ֆինանսական զգալի ներդրում կբերի բյուջե։
Հարկային բեռի ավելացման հետևանքով տուժելու են նաև հասարակական կազմակերպությունները, ահազանգում են քաղհասարակության ներկայացուցիչները։ Ավելին, Գայանե Աբրահամյանի դիտարկմամբ՝ հենց այս փոփոխությունները մի շարք կազմակերպությունների կկանգնեցնեն լուծարման վտանգի առաջ։
Եվ մինչ շահագրգիռ անձինք փորձում են բացատրել, թե ինչ կբերի իր հետ խնդրահարույց օրինագիծը, վարչապետ Փաշինյանը թիվ մեկ ամբիոնից գործող Հարկային օրենսգիրքը որակում է ապապետական և հանձնարարում օրենսգրքի փոփոխության գործընթաց սկսել։
Մանրամասները՝ տեսանյութում։
Ռոզա Վարդանյան
