ԵԽ-ն կոչ է անում չճանաչել Վրաստանի ընտրությունները և պատժամիջոցներ սահմանել Կոբախիձեի, Իվանիշվիլիի ու այլ պաշտոնյաների նկատմամբ

Եվրախորհրդարանը Վրաստանում կայացած ընտրությունների արդյունքները չի համարում վրաց ժողովրդի կամքի արտացոլումը և կոչ է անում չճանաչել դրանք։ Այս մասին ասվում է Եվրախորհրդարանի ընդունած «Վրաստանում ժողովրդավարության խորացող ճգնաժամը վերջին խորհրդարանական ընտրություններից հետո և ենթադրյալ ընտրակեղծիքներից հետո» բանաձևում։ Դրա ընդունմանը կողմ է քվեարկել 444, դեմ՝ 72, ձեռնպահ՝ 82 պատգամավոր, գրում է DW-ի ռուսական ծառայությունը։

«Քանի որ քվեարկության օրինականությունը լրջորեն խաթարված է խախտումների մասշտաբով, միջազգային հանրությունը չպետք է ճանաչի ընտրությունների արդյունքները։ Հետևաբար, Եվրախորհրդարանը մերժում է խորհրդարանական ընտրությունների ցանկացած ճանաչում և կոչ է անում դրանք կրկին անցկացնել մեկ տարվա ընթացքում, երբ գործընթացը տեղի կունենա բարելավված ընտրական միջավայրում, անկախ և անաչառ ընտրական վարչակազմի կողմից, միջազգային սերտ վերահսկողության ներքո՝ ապահովելու իրական արդար և թափանցիկ ընտրական գործընթաց»,- ասվում է փաստաթղթում։

ԵԽ-ն նաև կոչ է արել Եվրամիությանն անձնական պատժամիջոցներ սահմանել վրացի պաշտոնյաների և քաղաքական առաջնորդների դեմ, որոնք պատասխանատու են ժողովրդավարական հետընթացների, ընտրական օրենքների և չափանիշների խախտման, վարչական և պետական ​​ինստիտուտների չարաշահման համար։ Նրանց թվում են Վրաստանի վարչապետ Իրակլի Կոբախիձեն, Թբիլիսիի քաղաքապետ Կախա Կալաձեն,  խորհրդարանի նախագահ Շալվա Պապուաշվիլին, «Վրացական երազանք» կուսակցության նախագահ Իրակլի Ղարիբաշվիլին։

Առաջարկվում է նաև ԵՄ պատժամիջոցների ցուցակում ներառել վրացի դատավորներին, որոնք քաղաքական դրդապատճառներով դատավճիռներ են կայացնում։

Պատգամավորները կրկնել են Բիձինա Իվանիշվիլիի նկատմամբ պատժամիջոցներ կիրառելու կոչերը՝ «Վրաստանում քաղաքական գործընթացի վատթարացման գործում նրա դերի և երկրի Սահմանադրությամբ ամրագրված շահերի դեմ գործողությունների, այդ թվում՝ երկրում Ռուսաստանի ազդեցության գոտին վերականգնելու ջանքերի համար»։ Անձնական պատժամիջոցները ներառում են Եվրամիության բոլոր ակտիվների սառեցում և մուտքի արգելք։

Բացի այդ, ԵԽ-ն Եվրահանձնաժողովին և ԵՄ Խորհրդին կոչ է արել վերանայել Վրաստանի առանց վիզայի ռեժիմը՝ այն կասեցնելու հնարավորությամբ, եթե համարվի, որ «ժողովրդավարական կառավարման և ազատությունների ոլորտում ԵՄ չափանիշները չեն հարգվում»։

Թարգմանությունը՝ Էմմա Չոբանյանի