Հունաստանը պատրաստվում է իր ռուսական C-300 ՀՕՊ համակարգերն ու այլ զինատեսակները Հայաստանին փոխանցել․ Enikos

Հունաստանն իր C-300 զենիթահրթիռային համակարգերը և ռուսական արտադրության ևս երկու այլ զինատեսակներ, որոնք օգտագործվել են երկրի հակաօդային պաշտպանության համար, փոխանցելու է Հայաստանին։ Դրանք կփոխարինվեն իսրայելական արտադրության համակարգերով, գրում է հունական Enikos-ը։

Հաղորդվում է, որ երկրի  ԶՈւ-ի ղեկավարությունը վճռական է տրամադրված՝ շարունակել հունական զինանոցի ապառուսականացումը և հին համակարգերի թարմացումը նոր արևմտյան տեխնոլոգիաներով։

Ըստ  լրատվամիջոցի տեղեկատվության՝ ԶՈւ Գլխավոր շտաբը Հայաստանին ռուսական ծագման սպառազինության համակարգեր տրամադրելու առաջադեմ փուլում է։

«Հայաստանի ուժեղացումը զուտ հունական նախաձեռնություն չէ, այլ Ֆրանսիայի հետ համագործակցության արդյունք, որը նաև զենքով է նպաստում երկրի սպառազինմանը։ Աթենքի համար Կիևի փոխարեն Երևանին ուժեղացնելը ռազմավարական ընտրություն է՝ բազմաթիվ պատճառներով։ Առաջին հերթին՝ դաշնակցային շատ սերտ կապերի և նորագույն ընդհանուր պատմության իրադարձությունների, բայց նաև ընդհանուր կրոնական համոզմունքների պատճառով: Բացի այդ, ուժեղ Հայաստանը մեծ հակակշիռ կլինի թուրքական անզիջողականությանը, որը բացահայտ ուժեղացնում է Ադրբեջանին։ Ի վերջո, Լեռնային Ղարաբաղի իրադարձությունները դեռևս թարմ են»,- գրում է լրատվամիջոցը։

Ըստ հրապարակման՝ Հայաստանին աջակցելու որոշումը վերջին պահին կայացված որոշում չէ, այլ վերջին տարիներին համակարգված մշակված քաղաքականություն:

Լրատվամիջոցը շեշտում է, որ հիմա հայ ուսանողների թիվը երկրի ռազմական ուսումնական հաստատություններում կրկնապատկվել է։ Միևնույն ժամանակ, ավելացել է նաև Հունաստանում հայկական հատուկ նշանակության ուժերի զինծառայողների վերապատրաստվողների թիվը, ինչպես նաև ավելի ու ավելի շատ զորավարժություններին մասնակցությունը։

Ինչ վերաբերում է սպառազինության համակարգերին, որոնք Հունաստանը պատրաստ  է փոխանցել և ոչ անվճար, իրավասու աղբյուրները հայտարարում են, որ «ոչինչ չի մնա առանց փոխարինման»։

ԶՈւ Գլխավոր շտաբը հրաժարվում է այլ համակարգերի դիմաց Հունաստանում տեղակայված սպառազինության համակարգեր Ուկրաինա ուղարկելու հեռանկարից՝ երկու պատճառով։ Նախ՝ փոխանակման համար մատչելի համակարգեր չկան, ինչպես գերմանական MARDER զրահափոխադրիչների դեպքում, որոնք փոխանցվել են Հունաստանին խորհրդային արտադրության BMP-1-ի դիմաց։ Բացի այդ՝ ՆԱՏՕ-ն ու ԵՄ-ն ուկրաինացիներին տրամադրել են արևմտյան տեխնոլոգիայի զենքեր, և ուկրաինացիներն այժմ գերադասում են ամերիկյան ու եվրոպական համակարգերը, որոնց համար նրանք մատակարարման շղթա ունեն։

«Զենքի համակարգերը, որոնք Հայաստանին փոխանցման թեկնածուներ են, հիմնականում հակաօդային են և ծառայում են բանակում ու ռազմաօդային ուժերում։ Խոսքը C-300 հրթիռային համակարգի, և բանակի զենիթահրթիռային համալիրների՝ TOR M-1-ը և OSA-AK-ի մասին է»,- նշում է լրատվամիջոցը՝ ընգծելով, որ Հայաստանին դրանց մատակարարմամբ ճանապարհ է բացվում նոր իսրայելական համակարգերի գնման համար։

Հրապարակման մեջ նաև ասվում է, որ հայկական կողմը դրանց օգտագործման փորձ ունի, նաև դրանց պահպանման համար անհրաժեշտ պահեստամասեր, ինչը Հունաստանի զինված ուժերի ամենամեծ խնդիրն է, հատկապես՝ վերջին տարիներին ուկրաինական պատերազմի բռնկումից և ՆԱՏՕ-ի կողմից Ռուսաստանի նկատմամբ կիրառվող էմբարգոյից հետո։

Ի թիվս այլ բաների, այն փաստը, որ Զինված ուժերում դրանք պահպանելու համար անհրաժեշտ պահեստամասերից շատերը եկել են Հայաստանից, կարևոր դեր է խաղացել սպառազինության համակարգերը Հայաստանին փոխանցելու որոշման մեջ։

Թարգմանությունը՝ Էմմա Չոբանյանի