Քաղաքականություն
20.11.2024 | 22:16
Բաքվում ընթացող COP29-ի շրջանակում միջազգային իրավապաշտպան կազմակերպությունները քննարկում են կազմակերպել Ադրբեջանում մարդու իրավունքների վատթար իրավիճակի վերաբերյալ՝ «Կլիմայական արդարությունն անհնար է՝ առանց քաղաքացիական տարածության և բովանդակալից մասնակցության» խորագրով։ Միջոցառումը կազմակերպվել է Human Rights Watch-ի, Amnesty International-ի և մի շարք այլ իրավապաշտպան կազմակերպությունների կողմից։
Քննարկումների ընթացքում հատուկ նշվել է այն փաստը, որ Ադրբեջանում քաղաքացիական հասարակության անկախ ինստիտուտները փաստացի կաթվածահար վիճակում են։ Երկրում գործող հասարակական կազմակերպությունները գրանցման հետ կապված խնդիրներ ունեն, չեն կարողանում ֆինանսավորում ստանալ միջազգային կազմակերպություններից, որոնց գործունեությունը փաստացի արգելված է երկրում։ Այս համատեքստում արտերկրից ցանկացած ֆինանսական օգնություն համարվում է մաքսանենգություն։
Գերմանիայից քննարկմանն առցանց միացել է ընդդիմադիր «Abzas Media»-ի խմբագիր Լեյլա Մուստաֆաևան՝ խոսելով իր գործընկերների և այն մասին, որ լրատվամիջոցի աշխատակիցները ձերբակալվել են մաքսանենգության մեղադրանքով։
Միջոցառման ժամանակ նշվել է նաև Ադրբեջանում քաղբանտարկյալների խնդիրը, որոնք թիվն անցնում է 300-ից։ Ադրբեջանի իշխանություններին կոչ է արվել ազատ արձակել քաղբանտարկյալներին, այդ թվում՝ լրագրողներին, պայմաններ ստեղծել անկախ քաղաքացիական հասարակության ինստիտուտների և լրատվամիջոցների ազատ գործունեության համար։
Հանդիպմանը մասնակցած «Բաց Ադրբեջան նախաձեռնության» հիմնադիր Զոհրաբ Իսմայիլը լրատվամիջոցներին ասել է, որ Amnesty International-ի ներկայացուցիչ Մարիա Ստրութերսը լայնածավալ տեղեկություններ է տրամադրել Ադրբեջանում քաղբանտարկյալների ու նրանց վիճակի մասին։
Թարգմանությունը՝ Էմմա Չոբանյանի
