Թուրքիան՝ իր տարածքով Իսրայել ադրբեջանական նավթի մատակարարումների մասին

Թուրքիայի Էներգետիկայի և բնական պաշարների նախարարությունը հերքել է պնդումները, որ Ջեյհան նավահանգստից նավթ է մատակարարվել Իսրայել՝ այդ մեղադրանքները համարելով «լիովին անհիմն»։ Տարածված հայտարարության մեջ նախարարությունը ներկայացրել է Բաքու-Թբիլիսի-Ջեյհան (ԲԹՋ) նավթատարի շահագործման մանրամասները։ Խողովակաշարը, որը ստեղծվել է 1999թ. նոյեմբերի 18-ին Թուրքիայի, Ադրբեջանի և Վրաստանի կողմից ստորագրված միջազգային համաձայնագրի միջոցով, շահագործվում է ընդունող կառավարության համաձայնագրով: Խողովակաշարի թուրքական հատվածը կառավարվում է BOTAŞ International AŞ-ի կողմից՝ ԲԹՋ գործընկերների հետ գործառնական համաձայնագրով:

«BOTAŞ International AŞ-ը որևէ ներգրավվածություն և իրավասություն չունի խողովակաշարով տեղափոխվող նավթի վաճառքի հետ կապված»,- ասվում է հայտարարության մեջ։

Նշվում է, թե «Ջեյհանից Իսրայել նավթ մատակարարելու մեղադրանքները, որոնք, իբր, թույլ է տվել Թուրքիան, լիովին անհիմն են»։ Ասվում է նաև, թե «ընկերությունները, որոնք օգտագործում են խողովակաշարը՝ նավթը համաշխարհային շուկաներ տեղափոխելու համար Հեյդար Ալիևի անվան տերմինալից, հարգում են Իսրայելի հետ առևտուրը դադարեցնելու՝ Թուրքիայի որոշումը, իսրայելական ուղղությամբ առաքումներ չեն եղել»։

ՀԱՄԱՍ-ի հարձակումից հետո Գազայի հատվածում Իսրայելի պատերազմի սկսվելուց ի վեր հրեական պետության հետ առևտրային, էներգետիկ կամ այլ կապեր ունեցող երկրները բախվում են տարածաշրջանում այդ երկրի գործողությունների պատճառով հարաբերությունները խզելու կոչերի: Թուրքիան, որն անցյալ տարի դադարեցրել է առևտուրն Իսրայելի հետ, մնում է այդ երկրների թվում։

Նշենք, որ հետաքննող լրագրողները պարբերաբար տեղեկություններ են հրապարակում, որ ադրբեջանական նավթը թուրքական Ջեյհան նավահանգստում բեռնվում է Իսրայել մեկնող լցանավեր։

Կասպից ծովի պաշարներից նավթը Բաքու-Թբիլիսի-Ջեյհան խողովակաշարով հասնում է թուրքական Ջեյհան նավահանգիստ, որտեղից լցանավերն այն տեղափոխում են Հայֆա:

Բաքու-Թբիլիսի-Ջեյհանն ապահովում է Իսրայելի տարեկան հում նավթի սպառման շուրջ 40 տոկոսը։

Թարգմանությունը՝ Էմմա Չոբանյանի