Նոր կանոններ՝ հասարակական տրանսպորտում․ Երևանը պատրաստվում Է միասնական տոմսային համակարգին. ՏԵՍԱՆՅՈՒԹ

Նոյեմբերի 1-ից երևանյան հասարակական տրանսպորտից օգտվելու համար նոր կանոններ կգործեն: Անկախ նրանից՝ օգտվում եք MAN, ZhongTong, GazelCity, թե Higer մակնիշի փոխադրամիջոցներից, ձեզ անհրաժեշտ կլինի 100 դրամանոց մետաղադրամ կամ մեկ հպումով ձեռքբերված QR կոդ: 

Ինչո՞ւ է այս փոփոխությունը հենց հիմա կատարվում։ Սա քայլ է, որպեսզի հունվարի 1-ից միասնական տոմսային համակարգին անցումը սահուն արվի՝ ասում է քաղաքապետի մամուլի քարտուղար Հայկ Կոստանյանը։

Ուղեվարձի անկանխիկ վճարման տարբերակները շատ չեն․ կա՛մ պետք է ունենաք «Թել-Սել» բջջային հավելված, կա՛մ նույն ընկերության տերմինալից նախապես գնված տոմս, ապա ավտոբուսներում տեղադրված վալիդատորի միջոցով սքանավորեք QR կոդը։ Բայց վալիդատորների աշխատանքը հաճախ է խափանվում, և համակարգը չի ճանաչում կոդը։ 

Ընկերության գլխավոր տնօրենի տեղակալ Լիանա Հունանյանը մի քանի պատճառ է նշում՝ որպես հիմնական խնդիր ընդգծելով այն, որ գուցե սխալ կամ արդեն իսկ օգտագործած QR կոդ են փորձում վալիդացնել։ 

Բայց լինում են դեպքեր, երբ համակարգը մերժում է QR կոդն այլ պատճառով, օրինա՝կ վարորդներն անջատում են վալիդատորը։ Հայկ Կոստանյանի փոխանցմամբ՝ տեսահսկման համակարգ է ներդրվելու, որպեսզի վերահսկեն նման դեպքերը։ Երբեմն էլ կապի խափանումների պատճառով համակարգը վատ է աշխատում, և ուղևորը ստիպված է լինում սպասել այնքան, մինչև վալիդատորը հաստատի կամ մերժի տոմսը։ Հունվարի 1-ից ուղեվարձը վճարելու տարբերակները կշատանան՝ նշում է քաղաքապետի մամուլի խոսնակը։

Իսկ ինչո՞ւ է «Թել-Սել»-ը հայտնվել մենաշնորային դիրքում․ 2022 թվականին հասարակական տրանսպորտի միասնական տոմսային համակարգի ներդրման և ֆինանսական օպերատոր ընտրելու բաց մրցույթում հաղթել է «Թել-Սել» ՓԲ ընկերությունը՝ լինելով միակ մասնակիցը։ Երևանի քաղաքապետի պաշտոնն այդ ժամանակ զբաղեցնում էր այժմ պաշտպանության փոխնախարար Հրաչյա Սարգսյանը։ Շատ են քննադատությունները նաև այն մասով, որ ընկերությունը պատրաստ չէր նման մարտահրավերի և չի կարողանում լիովին հաղթահարել  համակարգի ներդրման ընթացքում ծագող բարդությունները։ Լիանա Հունանյանն ընդգծում է՝ խնդիրները լուծելով առաջ են գնում։

Այս պահի դրությամբ՝ 830 վալիդատոր է տեղադրված համայնքին պատկանող ավտոբուսներում, տրոլեյբուսներում և մետրոյի կայարաններում։ Մասնավոր ավտոբուսներում, սակայն, վալիդատորներ տեղադրված չեն, և միասնական տոմսային համակարգի ներդրմանը զուգահեռ՝ այդ ավտոբուսները կհանվեն երթուղիներից։ Դուրս կբերվի Higer-ների հնամաշ շարժակազմը, կհանվեն նաև մետաղադրամ ընդունող սարքերը։ Նախատեսվում է ավտոբուսներում ունենալ երկու վալիդատոր, սակայն «Թել-Սել»-ից դժվարանում են նշել այդ փոփոխության իրականացման ժամկետները։

Մետրոպոլիտենում տեղադրված վալիդատորները գրեթե ամեն օր հերթերի պատճառ են դառնում։ Ի՞նչ իրավիճակ կլինի հունվարի 1-ից արդեն հասարակական տրանսպորտում․ քաղաքային իշխանությունից ու «Թել-Սել»-ից խնդիրները չեն բացառում։

Մանրամասները՝ տեսանյութում։

Արփի Հակոբյան