Ալիևի օգնականը հայտարարել է, թե խաղաղության համաձայնագրի կնքման տեմպը կախված է ՀՀ Սահմանադրության փոփոխության հարցում արագությունից

Նավթային պետությունը COP29-ի ընդունման համար ոչ պիտանի անվանելը կեղծավորություն է։ Ըստ ադրբեջանական լրատվամիջոցների՝ այս մասին ասվում է Ադրբեջանի նախագահ Իլհամ Ալիևի օգնական Հիքմեթ Հաջիևի նամակում, որը հրապարակվել է Financial Times-ում։

Նշենք, որ վերջին օրերին Հաջիևը տարբեր հրապարակումներով, սակայն նույնաբովանդակ ադրբեջանական քարոզչական թեզերով արձագանքում է COP29-ը Բաքվում անցկացնելու վերաբերյալ միջազգային կազմակերպությունների մտագոհություններին ու քննադատություններին։

«Նավթային երկրները ոչ պիտանի  հյուրընկալողներ պիտակավորելը կեղծավորների խաղն է: Երբ հաջորդ ամիս Ադրբեջանը հյուրընկալի COP29-ը, դա կլինի 28-րդ անգամ, երբ կլիմայական գագաթնաժողովը կհյուրընկալի նավթ և գազ արդյունահանող երկիրը: Բոլոր ընդունող կողմերը՝ բացի Շվեյցարիայից, մասնակցել են նավթային արդյունաբերությանը։ Ադրբեջանը երբեք չէր պատկերացնում, որ այս տարի կհյուրընկալի միջոցառումը։ Մենք ակնկալում էինք, որ մեր դիմումին վետո կդրվի հարևան Հայաստանի կողմից։ Սակայն անցած դեկտեմբերին Հայաստանն աննախադեպ գործարք կնքեց և համաձայնեց աջակցել Ադրբեջանին՝ խաղաղության բանակցությունների շրջանակում»,- նշել է Հաջիևը։

Անդրադառնալով Հայաստանի և Ադրբեջանի միջև կարգավորման գործընթացին՝ Հաջիևն ասել է, որ բանակցություններում զգալի առաջընթաց է գրանցվել, ակտիվորեն աշխատում են սահմանների սահմանազատման հանձնաժողովները։

«Շատերը կցանկանային տեսնել պաշտոնական խաղաղության համաձայնագրի ստորագրումը մինչև COP-ի մեկնարկը, բայց դա կողմերը պետք է համաձայնության գան բանակցությունների սենյակում: Հայաստանի Սահմանադրությունը դեռևս պարունակում է ռևանշիստական ​​պահանջներ Ադրբեջանի տարածքի նկատմամբ։ Խաղաղության համաձայնագրի կնքման տեմպը մեծապես կախված է նրանից, թե որքան արագ Հայաստանը կարող է առաջ շարժվել այս հարցում։ Քննադատները, որոնք սա անվանում են ձգձգում, պետք է հարցնեն՝ արդյո՞ք իրենք խաղաղության պայմանագիր կստորագրեն, քանի դեռ իրենց նախկին հակառակորդը հավակնում է իրենց տարածքին»,- հայտարարել է Ալիևի օգնականը։

Թարգմանությունը՝ Էմմա Չոբանյանի